Махачкала шагьурдин Дом дружбы агъа усаъ хьуне хизанарин ягъан мегIрака. Мич унахъуна уйи 25 исалас, 50 исариласра вартт хъай яшамиш хьу хизанарис, ппара шиникквар хъаяттарис, хъара СВО-йигI ишттарак аркьа эскерарин хизанарисра.
Ме мегIракайил Дагъусттандин Правительствойин паттаас чугъсагъулдин кIеджар йине 10 хизандис, хъара 22 хизандис йине «За любовь и верность» агъа медалар.
Ме джавизар мебурис йине хизанарин арабур цIуппе акьуна ухIубан рекуьъ диву загьматихъас. Ме мегIракайигI ишттарак акьуне Дагъусттандин премьер-министирди Абдулмуслим Абдулмуслимова, вице-премьер Абдурахман Махмудова хъара Минтрудин министр Магомедзагид Кихасуровара.
Абдулмуслим Абдулмуслимова салам йине мич ади гIуларис Дагъусттандин хIаттин Сергей Меликованттуранихъас, хъара цIуппе хизанар хье хIуькуматин хIа девлет э пуне.
«ЯгIайин ягъа хье хIуькуматисра хье республикайисра багьа хIаягъарикес сад э ме — День семьи любви и верности агъа хIаягъ. Хизан адавахаб джемеIетра ахьасттава, хIуькумат ерлира ахьасттава. Чвас мункинвел йиная гьемидегьен исари хъай яшамиш хьас, дехIела чун хъара сад сайис кумак аркьай, сайи сад шад аркьай, шиникквара хIа аркьай илгван гьуларикес хьурай.
ЯгIа чве валадар зурбадалди гьужумдин удигь ая, гьеме хIуькуматис читин вахттуни. Тебур джалла — игитар э», — пуне Абдулмуслим Абдулмуслимова.
Джурейи чугъсагъулдин чIалар Абдулмуслим Абдулмуслимова пуне Хасавюртовский райондиас Аджиеварин хизандис, Сулейман-Стальский райондиас Курбаналиеварин хизандис, Махачкалайиас Магомедоварин хизандис, хъара Кайтагский райондиас Мирзаеваринра Дербентиас Гускейхановарин хизанарисра, мебурин дадарина шиникквари ишттарак аркьай аяхIела СВО-йиъ.
КIвал акьасе, 2009-пу исахъас2024-пу исасттегьен ме джемеIетин «За любовь и верность» агъа джавизар йиная 973 дагьусттандин хизанарис. 2025-пу иса йис йиркIураъ ая хъара 70 хизандис.

Батитай Габибулаева