Хье республикайин тарихдиъ садпегелай вея Дагъусттандин милатарин спартакиада башламиш акьуная. Спартакиадайин хIезурвеларихъас гъургъас Дагъусттандин Правительствойин Председательди Абдулмуслим Абдулмуслимова файшуне совещани. Ме арайил акьу физкультурноспортивной мегIрака садпеф э хье Дагъусттандин тарихдиъ вей, 3-пе сентябрьдихъас 30-пе сентябрьдисттегьен.
Ме спартакиада арайил акьуф Абдулмуслим Абдулмуслимован кьасттунилди э, ме арайил акьунафра гьер джуре хIаягъарихъди э: Дагъусттандин милатарин садвелдин ягъахъдира, хъара хIа дегIвин Гъалибвел гъушубан 80 ис хьубахъдира.
20-пе сентябрьди Махачкала шагьурдин стадион «Труд» агъа усаъ дахъуне ме мегIрака мисан ишттаракчибурин парадилди. Премьерминистирдин чIаларилди спартакиада хьасе агъа хабар нуш хьуне Дагъусттандин халкьдис. МисагI ишттарак аркьай ая республикайин джалла районара шагьурара. Ме спартакиадайиъ хьес агвасе нае районарна шагьурар ичин ке зурбадалди чаб агвар акьуттар, хабди мебури акьу кардихъ хъуттурфуна муниципальный образованибурис кьиматра йисе.
Авала Советский вахттари мишттин спартакиадабуриъ аркьафи спортивный парадар, аттверефи халкьдигI ттур ая физкультурникар.
Мишттин акцибури джаллабур саусал завал аркьай, гьертти учик кея гьунар агвар аркьайи. Мебурин зурбавелди агвар аркьайи Ватан ухIас хIезурттара. Джаллабурин кумакилди хьин ме соревнованибур акьуна кканде ке батIар мегIрака верегъилди хье республикайин, ме кар бадала Дагъусттандиъ физкультурно-спортивный движенибура авадан аркьагъилди хъара джалла миллатарин садвелдин символра верегъилди микес. Соревнованибур хьасе 16 джуребуриас: вольная борьбайиас, бокс, дзюдо, волейбол, мини-футбол, тхэквондо, шахматы, самбо, легкая атлетика, перетягивание каната, настольный теннис, баскетбол 3×3, армрестлинг, гиревой спорт, стрельба из лука, хъара национальный джуребур: гъван ахъатуб, гъузу усаас алдишиб. Ме соревнованибур хьасе Махачкалайиъ стадион «Трудин» майдандил, Каспийскдиъ Али Алиеван ттур але Дворец спортайиъ, Джафарован ттур але спортивный комплексдиъ хъара Дом шахмат Махачкалайиъ. Гъалибвел гъушу командабурисна призерарис йисе джавизар: пулра хъара кубокарна дипломар.
Батитай Габибулаева
