Ме кардихъасра хъара сасра суаларихъасра гъургъуне Абдулмуслим Абдулмуслимов кардин рекъуьаc Дагъусттандин Минздравдин хIаттихъай Ярослав Глазовахъай гьучархьу усаъ. Мебурихъай мисаъ уйи вице-премьер Абдурахман Махмудовра.
ХIуькуматин аптекабур дахъуна инсанарис мункинвел йина дуздин дарман гъушанас хьубахъас гьергелай гъургъаяфе республикайин Правительствойин Председательра. 2025-пе иса Минздравди башламиш акьуная аптекабур дахъуб Аптечный системайиъ ай, льготар ая инсанарис афухIуна мебурис рукьа дарманар ухIуб мебурин вазифа э. Удигьастти ме кар аркьайи хIуькуматин дава аптекабури.
Гьалдис дахъуна кар аркьая 8 аптекайи — Кизилюрт, Кизляр, Хасавюрт шагьурариъ, хъара Магарамкент, Леваши, Сергокала, Касумкент, Бабаюрт хIурариъра. ЯгIа багагь лицензи йихаба дахъас хIезурди ая 7 аптека хъара: Дербент, Буйнакск, Дагестанские Огни агъа шагьурариъ, хъара Ботлих, Хучни, Карабудахкент, Тарумовка агъа хIурариъра. ХIуькуматин аптекабур дахъухаб мункинвел хьасе кьайдайилди хардж акьас бюджетин пулар дарманар ухIубасна фатубас, ппара вахттра фадатас гьавайин рецептар лиркIенди вахттуни льготникарихъди рукьагъилди.
Дагъусттандин Правительствойи 727 миллион манат гьикуная больницабурин гереквелдин курар бегьем акьас.
Ме кардихъас хабар акьуне здравоохраненин министрди Ярослав Глазова кардин рекъуьас Дагъусттандин Правительствойин Председатель Абдулмуслим Абджулмуслимовахъай гьучархьу усаъ. Премьер министрди ул ачатуне мебури республиканский бюджетиас гьику пуларилди бегьем акьу курариъ.
Фи курар арайил акьуне гьику пулулди?
Башламиш акьуная 18 больницайин капремонт, ме исан ахирарис ккиркIвас икьрар акьуная. 400 миллион манатин гъушанасе герек иде деликар, мисагI гIая рентген-аппаратар республиканский Центр кардиологии и сердечно-сосудистой хирургии агъа усас, хъара операционный деликар гъушанасе Республиканский клинический больницайис Вишневского агъа ттур алеттис. Гьемишттин герек деликарна шейэр гъушанасе Буйнакск шагьурдин поликлиникайисра, 15 Фапдисра, хъара больницабурин ибгIавел аркьа котельныбурин деликарисра генераторарис гьикуная 38,8 миллион манат. Льготникарин гьавайин дарманар хъучатубас федеральный бюджетиас йиркIураъ ая гьикас 711,4 миллион манат. Гьеме кардис республиканский бюджетиасра 2025-пе исас гьикасе 3,1 миллиард манат.
Дагъусттандиъ нацпроектин рамкабуриъ ай капитальный ремонт аркьая 76 объектин.
Хъара мебур гъургъуне ме исан ушу 10 вазалан арайиъ республикайин здравоохранени акьу курарихъас, ме отраслин авадан акьу курарихъас, хъара Дагъусттандин хIаттин буюрмишар арайил акьубахъасра. Мисаъ хабар акьуне хье республикайиъ здравоохраненин арайил акьуная 10 региональный проектар, хъара 9 — нацпроектин рамкабуриъ ай «Продолжительная и активная жизнь» агъаттара. ЯгIайин ягъас батIар акьуна ккиркIуная 30 объект, 46 ккиркIвас аме. Мебур кидавай 11 объект гъадивуная, 29 объектиъ акьуна ккиркIуна са-са герек деликар шейэр арайил акьас аме.
Гьеме проектарин кумакилди хье республикайин больницабурис йиная 171 машин иттаттара духттурара герек усарихъди рукьас аркьаттар, хъара 746 гьалдин идже медоборудованира.
Батитай Габибулаева
