Хабар давай алттушуне гIулин ягъар. Хъучавея цул. Цулин садпе ваз сентябрь э шиникварин каникулар ккиркIуна махьтабариди вере вахтт. 

ГIедат идегъилди каникуларин верефе хьибу ваз, амма хьибу ягъ хьеф суман дахьуна алттве ягъар.

Са гагьра хьунадава мегIелимарин ОГЭ- ЕГЭбуригIас, махьтабариъ батIарвеларигlас, гIулин кураригIас гIайчIуна. Хаб хIезурвелар аркьай аваранди ая мегIлимар.

Махьтабарин хIезурвеларис мегIелимарихъай барамбарди чалишмишди аве дадар-бабара. Хурас гьика студентарин къайгъу аркьай махьтабариди кичавере шиниккварис аликIа кан, герек иде шейэр гъуланди. Ме вахттуни джалла чалишмишди аве.

Садпе сентябрьдис хье хIуькуматиъ мегIлимарис Министерство образованин рекъуьъ духIубавелар тIалабар гьер иса аве. Ахиран вахттари кIилди регионариъ Федеральный программабурилди ачмиш аркьая цIае, гьалдин заманайин оборудовани ая махьтабар, махьтабарин гIанаъ дахъуная куче ямаг Iеле мукьар. МегIелимарис мункинвел хьуная "Земский учитель" агъа программайин пулун майилдилди кар акьас мегIелимар кьитти ая, варха мукьариъ ая хIурариъ.

Мебур кидавай кьанди республикайиъ хьу Августовский совещанил хабар йине 150 агъзур манатин майил хьасе пуна иджи кар акьу педагогарис.

Хъара садпе классиди кичавея, ппара шиннквар ая хизанарис акьасе пулун кумак. Хье региондиъ ме кар арайил акьуне 1-пе июльди 2012-пе исан. Ахиран исари хьуная "Соберем ребенка в школу" агъа иджвелин кар арайил акьуная хIа гьулари.

Ме акцилди майил аркьа ятумарис, СВО-йин ишттаракчибурин шиниккварис хъара къазармишвел ппара ада хизанарис. Ме исара Минпросвещениас хабар йиная духIубавеларихъас.

Садпеф алгъузасе аликIа кунарил. Шиникварин шиберин кунар хьуна кканде ая чуьлле рангунинттарна джагварттар, Шиберин кIилил аликIа ягълукъ хьуна канде ая lекве чуьллеф, хIаягъарин мегIракабурис хьуна канде ая джагвар рангунинф . Гьелбетта са са дадар бабарис хIа гъам суман ве мишттин тIалабар, амма пас кканде авалдин вахттарира аликIафи хIукуматин ая гIедатарилдина тIалабарилди. Ухшар суман махьтабис чишнара э ме кар. БицIи духIубавелар хьуная дарсарин. ГIачихьуная цIае китабар, Хье Агъул райондиъ махьтабарин духIуьбавеларихъас тIалабарихъас хабар йине 26- пе августи хьу Августовский совещанил Агъул райондин хIатти Закир Гусейновича. ГIилмин рекъуъ мишттин духIубавелар аркьая хье шиниккварин хурубарин рекъ ачухъ хьас э мегIелимари аркьая загьматин кьимат варттхьас джефа чукь акьас. Ахирахъди пас кканде хье шиниккварис рехIетти алттушурай ис, хурубарин рекъ ачухъ хьурай, фикирар кьасттар алтухъ хьурай. МегIлимдин кар хIа кьиматинф э, сагъвелар йирай чиппи аркьая кар давам акьас. ХIуькуматин багухъас майил ппара хьурай гьалдихъас хабра кар акьас гIешкъ хьас, шиникквар гIилмин эессибур акьас, чиппи аркьая загьматин дараджабур алтухъ хьурай.

Наиба Гасукаева