ХIурин мукьуйин манзилис,
Лекар атай тукарис.
Гьава суван раджарис,
Дагьарарин кканччарис.
Iуьмур уч ппара тамашин зад э, гьер са джан але задунис. Мертти тамаш э инсандин Iуьмур. Гьер сайис уч ху мукьуйиъ учин кьисмат иде ризкьра хIезурди аве. Гьелбетта миштти пугуна мебурис са джафара адавай хIезурди авейдава. Учин кьисмат иде ризкьи гъилиди адес мебури гьертти учифас верегъилди загьматра дивуна кканве. НехIекьди дава агъаф найисаъ хучин гьетисаъ лазимра хьасе пуна.
ХIа пай гьалдин инсанарис алтухъ хIурариъ кканвейра андава. Джегьиларихъас гъургъучин, мебури джаллабури шагьурдихъди дивая.
Фидегьен хьес шагьурдин Iуьмур рехIетти, батIарди аргвайчира, хIурин гьава, тIабиIэт алтухъ э. Гьелбетта хIурариъ яшамишдин шартIар четине, курара къалине, амма гIулин вазари гъазе чIирарин, чIирариъ ахъуная агъзур джурейин тукарин ухьтанвелди кIилди четинвелар, бизарвелар аларта.
Хъара батIарди аве дагъдин хIурариъ. Гьава сувариъ ада джурейин тукна IуькI, джакьвна нахшир адава. БатIарвелдихъай барамбарди тушкин вахттара хъаве суварихъ. Са вахттари тIинкI угъалин кедархьай къурахди аве, са вахттари алахъуна угъай угъал, хибхел байирдин курарис мугьлат дайирцIанди аве. Ттиан исав те багвра ме багвра фая.
Ке Iайи мал-къарайис, IуькI уцас ккея гIарарис, джемеIетин узуная мехIсуларис хьед ккане вахттуни угъалар кьит вере вахттара аве. Учин вахттуни Iашар дахьучин мехIсулра чIукь ве. ХIурин мукьуйиъ гIулин курарикес ке хIа загьмат алдея кар э гIар уцуна IуькI-кьал акьуб. Ме кардихъ мус хьучира джурейи, фикир акьуна хъучавереф и халкь. Вахтт ккими хIезур аркьайи чиппис деликар. Четин кар идехIела, джандис алтухъ гIезаб аладархьас гъавурдиъ ай фикир ирцIанди Iелеттисра. Гьертти учин мункинвелдихъ хъуттурфуна гIане акьас алучIайи тIун, бицIиф-хIаф дапуна кардин эессибури. Сури уцучин, сури дивай завал аркьайи IуькIер. Ягъар кучи идехIела алийина рагъра кIилин ягъди байирдиъ эдеркьвас мучI ккими вей абкьанис хулаъди вейи шавла ккетас, хабди сарин хьугуна вейи чиппин кар давам акьас. Гьемиштти арайил аркьай авейи хуппурарин курара. Суварихъди вереттари, рекъуьн вархавелдихъас чиппин Iелеф — ухаф кIилди фай алгъавейи абкьанис аладавес. Гьал авала суман джаллабури ухIай андава малара. Мал хъаяттар далара хъадаваттар ппара э.
Амма ппара четинди аве инсанарин хIел маларис Iурдис ахъилан IуькIерихъас сур исари. Хьидана ппараIди угъалар дугъухаб IуькIра е гьава вейдава, е къалин. Хьуная IуькI дехIера уцуна арайил аркьа вахттуни угъалар Iайи угъухаб мертти ч.ирве курар, багъар бусттанарин мехIсул завал аркьа вегIдайи угъал къалин хьугуна са задра гьуркIуна гъилиди дарукьуна барбатI ве. Байирдин курар акьас мугьлат вейдава. Вахтт алдава вахттуни угъал ппара хьугуна калтуфара утIая.
Гьер иса фи багьана хьунара халкьдин гъилиъди чиппин герек иде мехIсул рукьайдава. Ичинра бицIиди гьавабури мункинвел йигъилди айчIва инсанар гIарариъди, ая IуькI дехIера уцас, хуппурариди мехIсул завал акьас. Фас пучин, гьер шувафас аттрукьайдава пул йина гъушанасра IуькI э е дахьучин емишна калтуфра. АцIуна багьа агъай аве мишттин иса джалла задара.
Фиппур хьин пучира тIабиIэтин шартIар инсанарилас асуллу дава, михъай бехIс акьас хьасттава. Арайил акьас хьуттар, ишламиш акьасра мугьлат йирай хьес!
Салихат Малагусейнова
