Агъул райондиъ ягъалас ягъа ппара вея COVID-19 агъа иттал дагьас руб йирхIуттар. Гьер хIурин инсанарис, руб йирхIас мункинвел адаттарис райондин больницайиъ, хье Агъул райондин больницайиъ ая ачмиш акьуна ФАП, чипин
вере инсанарин бригада хъай.
Мебурис удигьай хабар ирцIанди хIурин хIатти руб йирхIас хIезурди ая инсанар сан акьуна. Кьанди хье райондиъ бригада ушуна уйи Кьушандерейиъ, ке варха мукьуйиъ ая Буршагъарин хIуриъди. Ме хIуриъ иттал гIаттина вахттуни, иттаттар ппара уйи. Миштти идегуна, вакцина акьас кканеттар,
гьезурттар ппара хьуне, ке удигьай мактабин идарайиъ кар аркьа инсанар.
Агабекова Фатима Тажудиновна э сасра хIуриас адиная мегIелим-дишагьли, сасра хIуькуматин чIал ягIар аркьаф, Буршагъарин мактабиъ кар аркьаяф.
Ме уч э «Земский мегIелим» агьа программайилди кар аркьаф. Фатима Тажудиновнайи ахъакьуне час фиштти уч рази хьуна ичин ме итталин руб йирхIас, фи хабар йина айчин джанди, ме руб йирхIухаб.
— Зун ме хIуриъди кар акьас адина алттархьуна ая са ис. Цац Iурдана зун ушуна уйи каникуларис зе хIуриъди,те вахттунис че хIуриъ итта инсанар ппара уйи. Иттархьуне зун, зе баб, хIадад, хъара че багунттар уйи иттаттар. ХIададас ппара четин хьуне, ягIара джандин гьава буштти ая. Бабасна зас ппара четин хьундава, температура хьуне, бицIи мухур хъуйи.Че анализари агвар акьуне чаc COVID агъа иттал хуна аяф. Удигьай чин иттар хьугъилди, чин кьастт акьуне ме итталин руб йирхIас, фас пучина баб учра кар аркьаяф мактабиъ, засра гучI гьуйи Iудпегелай ме иттал хьас. Зун сасра хIуриъ кар аркьа инсан э, захъас суман зун фикир акьуне зе кардин илдешарихъас, хъара зун дарс ицIанде шиникварихъасра, ме бицIи хIурин инсанарихъас.
Садпегелай зас руб йирхуне Буршагъарин хIуриъ, фера хабар хьундава. Iудпегелай зун ушуне Агъул ЦРБйиъди. Iудпе компоненти зас хабар йине-гъайшине температура, кIилин Iуьр, руб йирхIу мукьуйиъ Iуьр ай са Iу-хьибу ягъ хьуне. Джандин гьава дегиш хьуне. Хабди амурдиъ ачархьуне зун, агьалдис иджи ая, гучIра гьандава удигьай суман. Джаллабурисра пас кканде, йиркIуран гучI дакьуна руб йирхIучин идже хьасе. Хьин хьехъас суман фикир акьуна кканде хье багункIиларихъасра.
Наибет Гасукаева
