Инсандис йиная савкьат э джандин сагъвел. ЯгIайин ягъас цIуьппе сагъвел хъая инсанар сад-Iудра андава. Джигьил, Iусеф агъай андава итталари. Джалла инсанарис ягIа итталарин сандигI гIачархьуная гьеме сайисра ундихьу коронавирус агъа итталра. Ме иттал хIевалат хьуная хье вилаятиъ аядегьен халкьдил.
Магьа Iу исдегьен гагь э ме иттал хье инсанарил алгъазийина. Алттушу ис ппара четинф хьуне. Фера сара джуре курарихъас фикир акьубан кар адавуйи, Iари ме итталин фикирдала. Ке цIайи хабарсузди аттархьугуна е гьуркIу дуздин аркьа руб, дарман дагIай, больницабуриъ иттаттарис мукьар адавай ппара ягъар, Iуьшар алайшуне духттурариласна чаб итта инсанарилас. Фиштти хьучира дуьйик муш киметтарис сара чара хьуне, амма ацIуна кIиттара хьуне.
Хабди хье хIуькумати учин халкьдис са чара хьас пуна, адихьуне ме иттал хаб йирхIас аркьа руб — вакцина. Магьа алттушу исан декабрь вазалахъас хаб ме вакцина инсанарис йирхIас башламиш акьуна. Уч руб Iу нубатилди атафе, сегелай сад, хьибу хIефттайилас сасрара.
Амма ая инсанар ме вакцинайихъ гучIай иджи хъудугъаттара, эхIттият фай хъуланттара. Чаб иттар дахьу гагьди садра гъавурдиъра архIасттава ме коронавирус итталин, ми инсанарис акьу зарарил. ЯгIара джан ачухъ акьас дахьуттар аме коронавирус хьуна сагъ хьухабракегьей. АцIунттарин хизанаригI гIархьуна ме азар, са хулаас Iу-хьибу майитар аттфайшу иттал э ме. Ме итталин гъавурдиъ ая инсанари чиппи димари ушуна йирхIас аркьа чиппис ме вакцина.
Гьалдис хье райондиъра ацIун инсанари йирхIуная ме руб, алдай гIерз аркьаттара хьуна адава йирхIухаб чIирхIе хьуне пуна. Ме ягъари садпе руб йирхIуная Роза Рамазановайи.
Мифас хабар гъушугуна фиштти хьуне пегун Розайи йине джувабар.
«Зун ппара фикир акьуне ме вакцина акьастти, фиштти хьасегьан пуна. Тил-мил агъаттарилра йиркIв алиянди зун. Хабди гьертти агъаттар тIегIем акьухаб, зун зас пуне: «Вун вас эхIттият дакьухаб, вахъ хъучаверефра хьасттава». Гьеге и зе ахиран чIал. Зун дагьичира джандин сагъвел адава дишагьли э, вархалас вей ами куькъа зак итталар. Гьеме коронавирусра зас куьркьухаб фиттин ккимилгванаси зун. ИдехIела ушуна хье больницайиъди йирхIуне зун вакцинайин руб. Цацан истти джаллайисра агуне рубар, дармар аркьайчира фишттира ме иттал хьегьас вархал дахьуф. Тиштти кумак дахьухIела э ме вакцина хIуькуматиъ адихьуфра. Ме руб джаллайира йирхIуна кканде коронавирус кьацIраминдай гулангъилди хье гьавайигIас», — пуне Роза Рамазановайи.
Батитай Габибулаева
