Вея 2022 иса Дербентин 3 объектис федеральный бюджетиас пул хъучатасе

21 пе декабрьди Дагъусттандин Правительствойин Председатель Абдулпатах Амирханов учин кар бадала ушуна уйи Дербентиди. Мисаъ ми акьуне совещание, гъадивуна уйи суал ме шагьур кегъдивас, батIар акьас фи курар акьуна кканди айчин 2025 исас.

Абдулпатах Амирханова йиркIурал акьуне апрельдин вазала Дербентиди аде хье хIуькуматтин Правительствойин Председатель Михаил Мишустинан буюрмиш 2025 исас мевус батIар акьуна арайил аркьагъилди.

«Ме ис исал рукьуне, ахирахъди акьу курарихъас гъургъучин, Дербентиъ ме курар суман, хъара сасра программабур, нацпроектар арайил аркьая. ЯгIайин ягъас мисаъ дахъуная 60 мукьуйин детский сад. Джалла йиркIураъ ая курар ме иса кIиркIвагъилди адава, джуре исахъдира илгванасе. Миштти вереф хIапай хIа объектар аркьагуна э. ХIаттари, усттабури алчихьа багьанабур пандемийил, стройматериалар багьа хьебал. Амма ме багьанабурилди кар бегьем вей адава, хье вазифа э мехIкамди вахттуни дахъуб мактабар, садикар», — ме чIаларилди дахъуне совещание Абдулпатах Амирханова.

Фиштти ккетвей айчин ме шагъур, кегъдивубан курарихъас ахъакьуне врио министра экономики Руслан Алиева. 

Ми кIвал акьуне федеральный хъара республиканский хъучату кумакилди акьас кея 54 арайил акьуна кканде мукьар.
«Хьедегьен дахи арайил акьуна кканде мебурин проектар. Ме проектар дахи хIезур хьедегьен, дахи гьикас хьасе заявкабур федеральный центрайиди.Ме заявкабур гьикас мугьлат йиная 1 марттисттегьен 2022 исан», — пуне Алиева.

Ме совещанил хъара гъургъуне 2022 исан федеральный бюджетихъас, хъара 2023-2024 исари гIачихьуна пул фатас акьас йиркIураъ ая 3 объектис. Мебур э: «Строительство водовода «Кайтаг – Дербент», «Строительство водовода «Шурдере», хъара «Строительство общеобразовательной организации на 804 ученических места».

Ме иса мисаъ бюджетин кумак гIадавай акьас хъучучIуная гьер джурейин Iэквар ича фонтанра.

2022 исалас фикирдиъ ая хъучучIас гъадивагъилди инсанарис хулар, дуканар, эл керта мукьар.

Ме кардихъас Абдулпатах Амирханова буюрмиш акьуне шагьурдин администрацис хьедегьен дахи хъучаверегъилди ме акьас йиркIураъ ая джиларихъ ахтигьар ая агъа кеджар завал акьуб, маслихIет акьуна инвесторарихъай. 

ЙиркIурал акьучин, хье Дагъусттандин хIатти Сергей Меликова гIативунафе Дербентин кураторвелди, мисаъ аркьа кураринра къайгъу аркьагъилди Абдулпатах Амирханов.

Батитай Габибулаева

Добавить комментарий

Ваш адрес email не будет опубликован. Обязательные поля помечены *