Варвар ухIа пеша

ХIа пай инсанари хIисаб аркьа, варв ухIас джалабуривас аттрукьа пеша э пуна. Хъара варв ухIубаъ хайр ппара ая. Амма гьер инсандифас кIил аттивас вейдава ме пешайиъ гIешкъ айчинара. Ахмедов Надир Садировича сад пе ис дава варв ухIай. Мин ая учин уьрегенар, ая дикван, варвар ухIас кканеттарис лазим вере шейар аяф. Чин ме кардихъас, ме пешайхъас, алихьуне суалар Надир Садировичас.

— Ассаламу гIалейкум, Надир Садирович! Чвас мубарак акьас кканде ве къулугъ, хье Дагъусттандин варварихъанарин Ассоциацин Председатель хьуна.

— Ва гIалейкум ассалам! Чугъсагъул чвас, чвасра амур акьурай мишттин пеша ачмиш акьас.

— Ахъакьас эв чун, фиштти ке удигьай ме пеша йиркIураъ дивунчин? Хъара уйив чве тухумигI, варвар ухIаттар?

— Ке удигьай зас ме пеша ягIар акьуф, зе мегIелим Мазанай Курбановича э. Хабди зун ягIар акьуне Iуьрус идемихъай профессор Владимир Георгиевич Кашковскийдихъай. Ми учин са пай Iуьмур гьикуная варварихъай. ЯрцIурна ерчIу истти Владимир Кашковскийди Iуьрусаттихъ ме пеша аркьай. ЛиркIенди китабар варварин пешайихъас. Миштти идегуна зас ппара хIа чугъсагъул пас кканде мебурис Iударис, зас ме рекъ ачмиш акьу бадалди.

Варвар ухIуб хIисаб аркьа лап авалдин, хъара джалла миллатарин пеша. Агьал зас суал алихьучин, фас зун ме пеша гIаттивунаф ичин джалла пешабурикес, ке удигьай зе мегIелимди ягIар акьугъилди йиркIураъ дивуне зе ме пеша. Варв уч мертте шейъ э пас кканде. Фидегьен мебурихъас вун ахъаджихIучин, вас хайр ппара ирцIанде. Хъара варварин лихубакес инсандисра ппара муфеIет кея. Варварикес инсандис суман, хайир кея хье мехIсуларис, тукарис, IуькIерис. ХIа гIелимариракегьей агъа, варв ккеттархьучин, дуья кеттархьасе пуна.

Агьал четинди ая хье Дагъусттандиъ варвар ухIа инсанарин курар. Садпеф, чIукь хьуная ме пеша аркьаттар. Iудпеф, ккеттархьая варвар чирхIе итталаривас, адава инсанар хIекьдан ме пешайин хIекь ягIаттар, адава хIуькуматин кумак ме пеша аркьаттарис, духттурар адава, варварис чIирхIе итталар бадил хьугуна хIел ягIаттар.ХIа пай итталара вереф варварис емишарис ича дарманарикес. Емишин мехIсул идже хьурай пуна ича, ама варварис ппара зарар ирцIанде. Варв уч гIентIе нахшир суман, мерттефра э.

Варварикес чукь хайр кедава инсанарис сасра аркьа курарикес суман. Варварин са уьтт фидигьен хайр кеяф инсандис аме шейар кедавай. Агьалра кегьей хIа гIелимаривас ягIар акьас хьуна адава фидигьен уьттан муфеIет инсандис кейчин. Зун варвар ухIа инсан э, зас пас канде, гьакIанди уьтт гIая хьеттик фидигьен хайр кейчин, фидигьен итталарис кумак аркьайчин.

— Ахъакь сара хье райондиъ акьу варварихъанарин Ассоциации форумдихъас.

— Че матлаб э ке удигьай хье Дагьустттандиъ ая варварихъанарис кумак акьас. Ассоциация агъа чIал тарджум акьугуна аттархьа инсанар завал хьуб, хъара чиппи чипис кумак акьуб аркьая кардихъас инсанарис ягIар акьас. Хьара час кканди ая хье Дагъусттандиъ ппара хьуна варвар ухIа инсанар, ачмиш акьас гьер районариъ уьтт масса ирцIан дикванар, варвари аркьа шейъар алтухъ акьас дикванариъ. Варвар ухIа инсанар алтухъ верегъилди. ГьакIанди пуная чIалар дава: уьтт мертте хьудегьен, инсанарин сагъвелра цIуьппе хьасе.

Наибет Гасукаева

Добавить комментарий

Ваш адрес email не будет опубликован. Обязательные поля помечены *