Вакцинация акьас хIезурди ая медсестра

Коронавирус агъа итталин вакцина вахтт гIартай вахттунис гъая Агъул райондиъ. Кьанди файдине 600 доза. ЯгIайин ягъас райондиъ руб йирхIуттар ая 411 инсан. Хъара ая сад-Iуд иттаяттара. ХIа пай вакцина акьуная курарил алди аяттари. Амма ая са пай инсанар вакцина акьас дакканттар, ая хIезурди аяттар акьас. Сад миштти хIезурди аяф хье больницайиъ кар аркьая медсестра Гюлизар Магомедовна Гусейнова.

Гюлизар Магомедовна, са суал алихьас кканди ая зас ме кардихъас. Вун больницайиъ кар аркьаяф хIа пай итта инсанарихъай, ве илдешара ке удигьай вакцина акьуна кканди аяттар, фас вун хIезурди айчира вас агьалра дакьунаяф?

— Цац майдин вазала пандемиябур ая вахттуни иттархьуне зун. Зе коронавирусдин анализ хьуне иттал кея агъаф. Ппара четин хьуне, гучIра хьуне. Са вахттра дахьуна Iуд пегелай иттар хьуне февральдин вазала ме иса. Удигьай иджи дакканди, хIезурди адавуйи зун руб йирхIас, Iуд пегелай иттархьугуна хье мукьарихъди рукьуна уйи вакцина, зас ахттигьар адава пуни, фас пучина вахтт гIайшуна кканве ме иттал хьухаб.

Гюлизар Магомедовна, ве багун-кIилари фи агъа вас ле кардихъас?

— Зе кIиркIра духттур э, шагьурдиъ кар аркьаяф. Зун иттархьугъилди пуне, вакцина адигъилди хье хIуриъди акьуна кканди ая вун баб. Миштти идегуна, зун захъас суман сасрабурихъасра фикир акьуна йирхIас хIезурди ая коронавирус давере руб.

Наибет Гасукаева