Вахттуни акьу кардил фушра пушмал хьасттава

Итталар, кьимат йина гъулан паяр дава. ЯгIа сагъди айчин, багайис хабарсузди иттал гIаттибра мункине. Амма ме Iу истти инсанарин фикирдиас аттархьуная джуьре итталар, коронавирус агъа иттал ягъди унихьай аяф.
Ппара яш хьу инсанарин чIаларилди ме иттал барамбарди э дегIвин вахттари уйи итталарихъай. Те вахттари, е гьуркIу дарман адавай кумак дахьуна луькIей ахьуная инсанар, гьал кканедегьен дарманар ая, вахттуни нае дарман аркьайчин дагIай кIиттар хьуне ппара. Ме кардихъас духттурар тахсир дава, инсанари ке цIайи ме коронавирус гIаттигун, духттурарис дагъай, варттал даркьай джинди чиппи чаб сагъ аркьай алучIайи хулариъ, хабди фишттира арайил алчадархьугун, больницайиъди вейи.
КецIайи ме итталис дузди аркьа руб-дарманра ягIайдавуйи хье духттурарис, ичира аркьа рубарикес чарабур вейи. Хабди ме иттал хаб йирхIас аркьа руб адихьуне хье хIуькуматиъ, инсанарис кумакис. Амма гьеме рубухъра иджи хъудугъай, дирхIай хьуне инсанари, коронавирусдис кканеф аркьай.
Ахиран вахттари хаб ме иттал джурейи алгъазийина ая хье халкьдил. Агьал хIаттарикес, духттурарикес ппара тIалаб ая инсанарис вахтт ами ме вакцина аркьагъилди, алтухъ ппара инсанар ая мукьариъ гъадатагъилди, мерттвел аркьай, хьудегьен эхIттият фай аруцагъилди.
БицIи-бицIи хье Агъул райондиъра вакцина акьу инсанарин сан вартт вея. Ме кардихъас гьер хIефттайин совещанил райондин хIаттис джуваб ирцIанде хье райондин больницайин хIа духттурди Магомедзагид Закировича, хьиму инсанди акьуна айчин вакцина. Мин чIаларилди гьалдис ме вакцинайин садпе руб йирхIуная 1287 инсанди, Iудара рубар йирхIуттарин сан хьуная 948.

Батитай Габибулаева

Добавить комментарий

Ваш адрес email не будет опубликован. Обязательные поля помечены *