Рамазанова Жарият Мазаевна хуная 18 июльди 1955 иса,Тпигъарин хIуриъ Агульский райондиъ. Гин дад, Рамазанов Бицимазай и къулугъчи. Учин кIилин Iуьмурди кар укьуная главный бухгалтервелди больницийинра, райпойинра, хабди экономиствелдира, товароведвелдира райпойиъ. Агьал ушуная пенсиди, нандиъра кар аркьай адава. Баба гин , Рамазанова Къизханума, нандиъра хIуькуматтин курар акьуна адава. Хулан курар, луьхунар аркьай экьуная хьир и ге. Къизханум кIина 31ис хьуная.
Жарият Мазаевна, ери ис хьегуна учин, 1962 иса ушуная махьттабиди. Махьттабиъ Жарият Мазаевнайи дарсар хуруная ппара иджи. Хъара джуре курара аркьай хьуная ги махьттабиъ, уч хурай амедегьен гагьди ( отрядной вожатывелар, политинформаторвелар, хъара джуре курара). Бици шиникварис Iайи кканвей хьуная Жарият Мазаевна, гис шиниквара Iайи канвей хьуная. Шиниквар вей хьуная гилди унархъай, чиппихъай вес экскурсибуриди, вечерариди, чиппин гьерджуре мегIракабурилди. Чиппис дарс адагунара унархъай хьуная гебури Мазаевнайис, чиппис дарс йисра, еридпе — муядпе классиа рушалди.
Гьетегуна демари, Мазаевнайин юркIураъ ахьуная махьттаб кIиркIухаб вес хурас мегIелимвелди.
1973 иса, кIиркIугуна махьттаб хуруна,аметтар суман ахьуна адава ме, нач весегьан хурас агъай. Ге ушуная хурас Махачкалайиди ДГУйин филологический факульттетиди. Тегуна авей хьуная хIа конкунсар уцIавусариъ. Мазаевна гIачархьуна адава конкурсдиъ. Ме экзаменара дайина гьикуная гидас заочный отделениди филологический факульттетин, гин джувабар чиппис кьабул хьунахIела. Ппара гъам хьуная мисс, уч гIачадархьехIела конкурсдиъ. БатIарди дарсара дахуруттар уцIуна, учивас дахьехIела.
Чара адай, адиная Жарият Мазаевна хIуриди заочнара акуна. ДжикIиная ми учис са хIилла чарайин кара. Аркьай кара, кумак аркьай дадар бабарисра экуная ме хIуриъ. БатIарди, иджи гIешкъуни аркьай хьуная ми кар. Кар ми акьуная отпускабуриди, декретариди, больничныбуриди ушунаттарихъас дарсар ирцIанди махьттабиъ Буркихан хIуриъ, Амух хIуриъ, Гоа хIуриъ.
1976-1977 хура иса кар акьуная Мазаевнайи Худиг хIуриъ. Са исалас, ге файдиная Тпигский махьттабиди. Гисаъ кар аркьай ге илгуная 2016 исасттегьен.
Тпигский махьттабиъ Мазаевнайи ирцIанди дарсар «Русский язык», «Русская литература», «Дагестанская литература» хIа классарис. Ге и высши категория ая мегIелим. Iари дарсар давуйи ги ирцIанди уйиф, хъара общественный курара фай уйи гив. Ге и секретарь мегIелимарин комсомольский организацин, ученический организацин.
Июньди 1988 иса Жарият Мазаевна учIуная компартиъ. Парттиъ уцIухаб ги кар акьуная парткомвелди магIелимарин партийный организациъ, СССР далгъванасттегьен.
Жарият Мазаевна э мегIелим «ОТ БОГА». Ги кар аркьайуйи юркIураастти. Мазаевнайис шиниквар ппара Iайи канверефи, шиникварис гера ппара кканвейи. Классин баб суман авейрефи ге. Фи кандиайчин шиникварис, гьеге аркьайи ги гебурис. Учин классин шиникварин дадар бабарира ппара хIа гафарар аркьай верефи гин. Шиникварин бабарисра ппара кканверефи ге. Жарият Мазаевна ппара Iайи идже мегIелим и. Учин дарс Мазаевнайис ппара иджи агIафи. Олимпиадабуриъ гин шиникварис хIа мукьар дахьуна верефттавуйи. Гьемишан садпе, Iудпе мукьар фаверефи гин шиникварив. ОГЭбурис, ЕГЭбурис ппара батIарди шиниквар хIезур аркьайверефи ги.
БатIарди ги кар аркьахIела, ацIуна наградабура файя Мазаевнайив. ГIер хIа ягъас ирцIанди авейи гис районойиас, махьттабиас грамотабур, подаркабур, званибур.
Правительственный наградабура файя Мазаевнайив. Ге э «Отличник народного образования РД», хъара «Почетный работник народного образования РФ».
Олимпиадабуринра, ОГЭбурин, ЕГЭбуринра ацIуна грамотабур файия Мазаевнайив.
Жарият Мазаевна Iари мегIелим суман дава иджеф, инсан суманра ппара иджефе ге. Фи герек хьучин, фи кан хьучин, джалла дустар верефе гилди. Гьанасра хаб атафттава ги. Ппара гъилин джумарт инсан э Мазаевна. Къуншибурис, багунттарис, хъучмабурис ппара гъил гьучихьафе ги цIакIин, гамачI агуна. Зун ппара шат э, гишттин хъучма захъ хъай.
2016 иса Жарият Мазаевна ушуная шувас курагъарин идемис, Абдуллаев Бичай Исакович агъаттис. Гебур ешемис вея Дербен шагьурдиъ. Шувас ушухаб, Жарият Мазаевнайи нандиъра кар акьундава. Гъуршанди учин пенсира экьуная хулаъ.
Ппара Iегвалде фаттархьас гисттин мегIелимар. Мазаевна суман мегIелим джикIес ппара читин э.
Я Аллагь Мазаевна, ве джандиъ сагъвел хьурай, юркIурас рехIетвел хьурай. Ве хизан вахъас кам дакьурай. Пара хьурай вун суман инсанар дуьнйил.
Вас ме мегIелимарин хIа ягъ мубарак акьурай! Сасра хIа ягъарисра шатти илгурай!
Нафият Шамсудинова
