Ттур ая бицIи хIур

(КIил удигьая номердиъ)

Кьушан-дерейин гьава джурефе Агъул-дерейилас, Буршагь мекI ппара вере мукь э, фас пучина, хьибу агьзурна цIегIуьфуд митIринди гьавайи ая гьуьлилас ме хIур. Мункин э мисаъ гIуланара ибхьер угъуб.

ГIулра мисаъ кьанайи вереф. Узубар акьас хъучучIа кьанайи, майдин вазалан ахираъ. ХIапай узаф мисаъ инсанари кьур, гъуяр, хъара кьутIар. Сасра мехIсул мисаъ вейдава, емишар гьуркIуна хъучархьайдава. ГIуланара мисаъ гьавайин учин уйинар аве. ХIапай ягъар ве эмсе, угъалара ппара угъа, хибхел хъай. Хибхели зарар ппара ирцIанди хьуная мехIсулис.

Инсанар Буршагъ ппара андава агьалдин вахттарис ая ягъцIурна гIуьфу хозяйство, Iу верш инсан. ХIапай инсанар айчIуна ушуная шагьурариъди, джегьилар хIапай лиханас ве Iурусаттихъди. Чаб буршагъар лиханас ппара кканеттаре. ХIапай ме хIурин идемарин пеша мал-къара ухIай чиппин дуламиш акьуб.

Хумбари ппара кьвадилкьванар аркьайи авалди. Агьалдин заманайи ппара аркьай андава, фас пучина акьуная джефайикъ къуттурфуна кьимат андавахIел. ХIур бицIиф ичинра, мисаас ппара ттур ая гIелимар, мегIелимар ушуная гьер мукьариъди.

Хъара ме хIуриас хIадждал ушуттар хьуная авалди транспорт адава вахттари хьилаба. Сад гебуригIас Багаудин-хIеджи. Авалдин вахттари южный Дагестандиъ ппара хIуьлматлу ттур ая диндис цIуппе инсан хьуная ме. Ппара инсанарис иджвел кеяф. ЯгIайин ягъас Буршагъарин хIурин мазгитал ттур алди ая Багауддин-хIеджин. Ми акьуная булахар, хъара мугIар. Хьин хье хIурар ухIуна кканди ая, фас пучина ме хье дадаринра хIададарин ватан э.

Наибет Гасукаева