Ттук адавахаб гъилар гьудаваф хIисаб э

Гьергелай ттук хъадихьудегьен фикир ве, фиштти хьасегьан агьал заманайин вахттари ая инсанарин курар са хIефттайи ттук дахьучин. Са хIефтта пасттава хьин, са ягъадехIера ттук хъаттархучина, дуя гъузунаяф суман ве, я са кардин эесси вейдава, акьу кара арайил вейдава. Хьес джаллабурис ягIа, агьалдин заманайи ая инсанари аркьа курар, хулан гIанаъ ая ачухъвелар, ферехIвелар, гIилмибур, техника, хIапай э ттукулди. Амма са Iу исарин удигьай адавуй агьал суман мункинвел, фикира кей вереф хьастта ттукулди мидигьен ачухъвелар хьасе пуна. ЯгIайин ягъас пасе хьин сад пеф​ интернетихъас, фидегьен курар бегьем аркьа са интернети. Телефон, компьютер, телевизор, — мебур хьес лазимве курарил, суман халаъра. Вереф хьес гебур ттукулди э. Кунар​ Iурччан машин, къабар​ Iурччан машинар, хулан гIанаъ ая ругъуфна ибгIа хьед, хулаъ ая ибгIавел — гера ттукулди э. Агьал хIурариъракей хьуная отопленибур, ибгIа ппулар, хIамамар, гунивар аркьа пичар канчира ттукунттар, ппара пегуна ппара иджвелар хьуная хулан гIанаъ суман, гьер багухъди хъуттурфучина ттуку хьес ачухъвелар ппара аркьая. Амма ая сае багв​ иджвелин — Iайвел. Хье ая мисала гьер иджвелихъ Iайвел хъая, Iайвелихъ иджвелра хъая. Ттукун​ Iайвел хьес ке удигьай аргва вазалан кIилил хьин ирцIанде хье угуна аядегьен ттукун пул. Гегуна фикир ве, авалдин вахттари ая инсанарин дуламиш хьуне, гьертти учи учис суал алихьа фас хьес ттук чIукьди хардж акьас давереф, авала суман дуламиш акьас давереф. Фидегьен хиялар, суалар хьучинра, хьес хьуная иджвелин хьин йина кканди ая учин хIекъи. Хье динди кканчинара хьес агъа инсандихъ хъаядегьен шейъ, девлет йина кканди ая закат. Ттукун иджвелра хьес вереф гьегиштти э, хардж ппара хьудегьен хIекъира йина кканди ая ппара, фидегьен хьес йиркIурас къекъе вейчира.

Наибет Гасукаева

Добавить комментарий

Ваш адрес email не будет опубликован. Обязательные поля помечены *