Типигъарин хIурин хIа идеми Iели Iебихъас

Магьме ягIайин ягъанисттегьен ацIун ягъар-Iуьшар алайшуная ме дуьньяйил але джалла инсанарилас. Иджвелара, Iайвелара алчархьуная, гашар, мекIер агуная. КьацIра ахъакьуна ккидиркIвадегьен тарихар ахъакьас хьасе авал вахттарин яш хье инсанарихъас. Фиштти четинди алайшунайчин гебурин Iуьмур.

Гьеме кар бадалди ООНдин ягъцIурна гIуьфудпе сессил са агъзурна ерчIу вершна яржцIурпе иса арайил акьуне октябрьдин садпе ягъ ацIун яш хье инсанарин хIаягъ акьас пуна. Хье хIуькуматиъ ме ягъ акьас хъучучIуне са агъзурна ерчIу вершна ерчIудна Iудпе исалас. Ме ягъ акьунаф гьеме яш хье инсанарис алтухъ батIарди хъутурфанас пуна, гебурис ккане-дакканф ягIар акьас пуна. Гебуринра йиркIураас хиял ушурай пуна чаб хIукуматис герек инсанар идеф. БатIарди хIисаб акьучин хIа инсанар параIди андаминдава, аметтаричинра ухIуна кканде. Гимил але хIа инсанар хIурарин батIарвелна баракат э.

Гьеме ягъанихъди багу вея ме исра. Миштти идехIела са бицIиди йиркIвра гъадивас уч кIвал акьубан, учин Iуьмурди училас алайшудегьен тушкинвеларихъасра, Iайвел- иджвелихъасра ахъакьурай пуна, зун алайшине хулаъди ме Типигъарин хIурин хIа яш хьуная инсандихъди (Раджабов) Iели Iебихъди (Iеларин).

Хуная Iели Iебай са агъзурна ерчIу вершна хьибцIурна муяд пе иса, цIеякьудпе июльдиъ, Раджабанра Тамаман касиб хизандиъ. Хьибу чуна са чи ахьуная мебур: учра, Шамамай, Кьулбан са хьиранттар, Пери агъа чи джуре хьиранф. Мин баб хьуная колхоздин къаравул, хуппай дад мис кьацIра кIвалдира андава, фас пучин мис хьибу ваз идегуна, рухаъ ая фермабур аркьа вахттуни иттархьуна кIиная.

Е мактабарин хурубра дагьуна, йицIу исаъ ай алчархьуная мил колхозариъ лихубар. Те дегIвин вахттари алтухъ хIа идемар хIурариъ андавай армибуриъди файшуна, лиханас алчархьай хьуная хумбарисна бицIи шиниккварис. Бабахъай вей ахьуная ме колхозарин курар акьас. Ис исалас алттвей бицIи яш хьуна кегъархьухаб микес хьуная неджбер язанар аркьай, IуькIер уцай, гьер джурейин колхоздин курар аркьай. Мин чIаларилди, агьалдин вахттунис неджберди колхоздин курар акьуттарикес амеф учна хIесанарин Iебдулагь э.

Хабди хьуная ме джемеIетин маларихъ. Квал аркьа ми, те вахттуни ГIелин Iебдулагь хIурин хIаф идегуна, учис адидегьен повесткабур армиъди ушуна кканде агъай, ме Iебдулагьа ирцIанди хьуная сасра шиниккварис ме дагъастти маларихъас хъаттадивас. Са ягъарикес са ягъа адиная мич хеварин идеми шиникквар армиъди гъареф. Маларихъас адеттис унахъуная мис селсаветIиъди Iебдулагьа.

Ме адиная идеми хабар гъуюная, фас э пуна ме шиниккв армиъди давеяф. ХIурин хIаттира джуваб йиная, ме зе джемеIетин маларихъ вере неджбер э пуна, ме ушучин, захъ гьика инсан хъудава пуна. «Зун ве маларин гъамуни адава, михъ хъая шиникквар ушуна хабра кехIей вере вахттар хьуная, мера ушуна кканде пуна гьегисаъ димари йиная мис повестка. Сара са агъзурна ерчIу вершна ерхьцIурна садпе иса верегъилди хьуная ме армиъди.

Хье райондиас садтти хьуная ме. Джалла вередегьенттар ушуна, садтти аттархьуная ме Свердловскди. Тич ушухаб хулаас вере кеджарикес ягIар хьуная мис те уч ая усаъ служит аркьай аф БицIибагьаларин Рамазанра. ДжикIиная ми те ая усра, ме уч строительный войскабуриъ ахьуная, Рамазан разведвойскабуриъ. Iели Iебин ахъакьубарилди, армиъ са четинвелра агуна адава мебурис, тIунис-тIунис иджи батIар емагар ирцIанди, мерткунра аркIай ахьуная. Хьибу истти служит акьуная мебури тисаъ. Хабди верегъилди хьуная мебур хулаъди, Рамазан милас дахи файшуф идехьела милас цIеерхьи ягъанди удигьай фатуна ахьуная армиас.

(Давамлу сасра номердиъ)

Батитай Габибулаева

Добавить комментарий

Ваш адрес email не будет опубликован. Обязательные поля помечены *