Мегелай хьин ахъакьасе тIамтIамар але
меркIухъас. МеркIв пугуна, джалабурин хиял
хьасе фи хайр, фи муфеIет кея, фиттис лазим
хьасе ме, учра зазар але меркIв пуна. Гьерттти гьергъилди агъа ме IуькIуьс. ТIамтIамар але меркIв, тук але меркIв, хъара агъа Казай.
Iуьрус чIалалдира ме IуькIуьн ттур гьергъилди э: расторопша пятнистая, чертополох, хъара молочный чертополох Святой Марии. Са джура ме IуькIуьн верефе Испаниъ, Мороккойиъ, хъара Тунисдиъ, Алжирдиъ са-са хIуькуматариъра хъара. Са джура ая хье дуьяйил гьер мукьариъ вереф.
Гьеме ке булди вере джура инсандис лазим вереф, ке муфеIет кеяф э. МеркIв уч гIентIе IуькI дава, агъучIа гьер мукьариъ. АгъучIаф хIа пай ме меркIв хьидана э, бицIи ибхьеринттар ами апрельдин ахирахъди, майдин сифтта кIилариас. ИбгIа мукьариъ ме IуькI агъучIа дахи. ТIамтIамар алеф агъа, фас пучина тук ахъасти ме меркIун цIабарил верефе джагвар тIамтIамар. Тук ахъухаба цIабариас агъучIа некк суманф.
Тукун ухшарар ме IуькIуьн неккдин IуькIуьс э.
ДехIела э Iуьрусари ме IуькIуьс агъафра молочный чертополох. Дармандис ме IуькI ишламиш аркьай аме авалдихъас хаб ягIайин ягъасттегьенра. Хьес джаллабурис ягIа авалдин вахттари дарманар агьал суман адавуйиф. ХIа пай итталарис ишламиш аркьай хьуная тукар, IуькIер, мерIер IуькIерин. Ке удигьай ме меркIун тумар ишламиш аркьа Iеле ямагаригI.
Авалдин вахттари Греция агъа хIуькуматиъ
ахьуная IуькIерилди дарманар аркьа джерехI
инсан Диоскорид агъаф. Ке удигьай ме
IуькIуьн цIабарин чейилди сагъ аркьай хьуная
иланди кьацI икIу мукьар. Хабди Плиний агъа
гIелим хьуная, ми ишламиш аркьай хьуная
цIабарин Iаш уьттахъай себун итталис, хъара
лекIуьн итталарис. ЛекI итта инсандис ппара
хайр ирцIанде ме IуькIуьн тумари. Хъара ме
гIелимди ликIиная учин китабарик ме меркIун
тумаригI гIая Силибон агъа шейъ хIекьдан
лекIуьн иттал — гепатит сагъ аркьаф.
Авалдин вахттари ая сасра гIелимари ликIиная чиппин китабарик хIекъдан ме меркIун тумарик кея муфеIетихъас хъара джуре итталарис кумак кея пуна. Агьал аптекабуриъ ая ме IуькI гIая дарманар гьер джурайин итталарис. Ама духттурарин ахттигьар адай хьес ишламиш акьас кедава е IуькIер, я дарманар.
Наибет Гасукаева
