Сусан сундукь

Ис исалас варха вередегьен шейъэра куьгьна ве. Фикир акьухаб са йицIу — цIегIифу исалас вартт вахтт алттархьу шейъэр, агьалдин вахттунис цIае джуребур аттархьуна цIуьре хьуна аве. Сад гебурикес э сундукь.

Гьалдин шиниккваривас хабар гъушучин фи шейъ э пуна ге, сасайивасдала джуваб йис хьасттава. Гебурис ягIай адава авалан инсанарис фидегьен герек шейъ ичин ге. Сундукь хъудава хал нагагьра авейдавуйи. Инсанари чиппис муфеIэт кеягъилди ишламиш аркьайи.

Те вахттари сундукьар ишламиш аркьайи шкафар суман, икIайи Iелеттар: макIаранар, нирхI, бурунз, пусукI, шаккар, нагагь хъаяхаб къайфат пиченира. Гисаъ икIуб Iуларигьасра цIуьппевел и. Хъара хумбари ишламиш аркьайи чиппин хаб чехиш акьуная гвегIенар, дасмалар, ягълукъар, кьумашар икIас пуна.

Гъилариъ аясуманттари чиппихъ хъая къизил, арс, пул икIуна цIьуппевел аркьайи, рукьра алихьуна. Гебур кедавай сундукьар гъайи сусарис кихьуная кан, лек икIуна.

ЦIакIинар аркьаттари ишанар кихьа ягъа, багу-кIилинттари кихьуная ишанар фай вейи сусан хулаъди аркьай мегIнибура лехъунара. Са-са сусарис гъаре сундукьарик кивейи батIар насихIетра.

Чаб сундукьар аркьайи кIураникес, вартталас алартIайи рукьра. Гьер милатихъ чиппин накьишра хъувейи сундукьарик, атафра гьер джурейин рангари. Чаб сундукьара гьер джурейин къайдайинттар аркьайи.

Гъал са ппараттарин хулариъ ул хъайчинра фачархьасттава сундукьар. Амма са-са инсанари авалдин шейъэрин кьимат ягIай, гъалра батIарди ухIай аме гебур.

Батитай Габибулаева

Добавить комментарий

Ваш адрес email не будет опубликован. Обязательные поля помечены *