Ширин Кайтаг

12 сентябрьдиъ Агъул райондис гIалашуйвелди унахъуна уйи «Вкусный Кайтаг» агъа фестивальдиъди Кайтагский райондин Маджалис агъа хIуриъди. Тисаъ джалла районариас адина гIалашувар уйи. Хье райондиасра ушуна уйи тич гIалашуйвелди. ГебуригI гIай уйи хье райондин КДЦйин директор Камал Гаджимагомедов, райондин администрацин отдел по делам молодежи и политики агъа отоделдин хаф Румина Курбанова, музейдин директор Зухра Мусаева, культурайин заслуженный работник Роза Ахмедова, Шабан Шабанов, Лукьман Адамов, директор КДЦ Гъудгъуларин хIурин КДЦйин хIаф Аминат Алиева, хъара сасра агъуларин артистара.
Ге фестиваль акьунафе 100 ис хьуная пуна Дагъусттандин АССРдин, гин микьдар э хьехъди туристар ппара адис акьас, хье Дагъусттан гIагъучIас акьас. Кайтагский райондиъ фестиваль акьуф , ме район ппара ттур аяфе пун учин дуькьубарин.
Гьер райондин шакъайив хье миллатин ямагар, Iелеттара фай уйи. Ке хIа ямаг хье — кучемуссу, хабди Iесида,суьлен гуни, ацIуттар, руьхьуь якк, хIуппан нис, хIунин нис, муссу, уьтт, уркьар, Iуьферар, кьутIурар, чIакьаIаферар, арджирар, бакъукъ, бекъелекъар, хъара ацIуна гьер джурайин ямагар.
АцIуна инсанар гьучавей хабар гъуршанди ахьуная гебурифас, фи задар ичин ме Iелеттар. Ппара Iайи кьабул хьуная джаллабурис кучемуссу. Фиштти аркьаф ичин, хабар гъуршанди ликIенди ахьуная мебуривас.
«Зун ппараттарил аларуцуне, ама чавдегьен гьерджуре Iелеттар сайивра фадавуйи. Уркьар фишти аркьаф агъаттара ппара вейи чалди. Iесида Iайи кьабул хьуттара ппара хьуне. Джаллабури гьучадиттари тем аркьайи кучемуссуйин. Ппара кьабул хьуне гебурис хье кучемуссу, хъара хье суьлен гуни. Россиин Геройдин дадас, Нурбагандовас кьабул хьуне хье уркьар. Гис учин бицIи вахттар кIвал хьуне гебур агуф. Учин баба аркьайи агъайи ги уч бицIи адегуна уркьар» — ахъакьуне Зухра Мусаевайи.
Ппара идже маджис хьуная Маджалисттиъ, музыкально — драматический, даргинский театрдиъ Амарла Батырайдин ттур але усаъ. Кайтагский райондин джалла инсанарил алди ахьуная чиппин миллатин накьиш але кунар, Iари Дагъусттандис дава гебурин накьиш ягIаф, сасра республикабурисра ягIа. Адиная туристарира ппара ул алчартай ахьуная гебурил, хабарар гъуршанди, фиштти аркьаттар ичин. Гебурин дуькьубар гъуршанде агъа сасра хIуькуматариъдира. Гьегебурилди гIагъучIуная Кайтагский район.
МегIрака ккиркIухаб йиная джалла маджлисил адиная гIуларис грамотабур «За активное участие», «За национальное блюдо» , медалар.
Хье Агъулаас ушуттарисра йиная гисаъ грамота «Вкусный Кайтаг», батар Iуьтубаригьасна, чиппин кар иджи файшубаас. Кьимат алиянттаригI гIахьуная дуьйиъ Iайи идже ттур ая поварар, конкурсариъ хIа мукьар гъуйуттар, наградабур фаттар.
Ресторанариас файдиная поварари, аркьай хIа хIуьягиъ аш, джалла инсанарис ирцIанди ахьуная.
Хъара ппара хьурай хье Дагъусттандиъ гишттин маджлисар.

Нафият Шамсудинова

Добавить комментарий

Ваш адрес email не будет опубликован. Обязательные поля помечены *