Шиникквар бицIи ами курарик вардиш аркьай кканде

Авалдин заманайиъ мактабиккес ккету вахттуни кумакар аркьафи дадар-бабарис шиберира кIиркIари. Еридпе — цIесадпе классариъ ая шиникквар, шибер фера даркьай артафттавуйи. КIиркIар верефи хIуппар гьикас, ккеларихъ, хIуниварихъ, урчарихъ, амма джалла маларин луджар джури аверефи. Шибери кьвадилкьванар рухай аверефи. Нагагь цIесадпе класс ккиркIуна учIас дахьучин, шибер верефи хIунивар узас фермайил. Совхоздиъ гебур ами сасрабур гьикафттавуй.

Дояркабурис фачийина уйи са хал красный уголок агъай. Гисаъ аверефи кьасусттира ахъаджихIа са инсан. Клубиъ кар аркьа инсанарис буйирмиш аркьай хьуна. Верефи завал акьуна клубиъ кар аркьа инсанара, вей хьуна дояркабурис хъара хIуппахъанарис мегIнибур, лихъунар акьуна эл ккетас. Хумбари бадрабурикес далдам аркьай хьуна, идемари — гум-зурна гъурарикес хъара сумарикес. Алгъихьуна ун аркьай лихъунар, вахтт фартай хьуна гебури.

Кураригьас вахтт хьу арайиъ аркьафи дурахIалар: ханавур, тIумбучаяр, кIутар шиланфи, рес-гиштта, хъара сасрабура. ЙиркIв алиянфи радиойиас мегIнибурил, вереф ккинубурихъ хъуттурфанас клубариъ.

Силосование агъай аркьафи каникуларин вахттуни са хIа къуй, гисаъди архъай хьуна гьер джуре IуькIер, гIархъай кьелра. Инсанарил алийина хьуна налук, гьер инсанди фачиянди  Iу верш килав Iашу IуькIерин. Ге къуйдиъ архъагуна са джар IуькIерин архъайи, са джар кьелан. Хуппай Iурдана фачиянфи урчар хуная хIуниварис некк ппара хьас, IуькIер аяф агъилди гъази амилгванди.

Красное знамя агъай ахьуна колхоз. Гебурихъ хъахьуная луджарилди вецар, утIаяр, хIейванар. Гехъуьнарин хIуьриъ ПаIакк агъа фермайил аяфи ери верш хIуни.  Дуьхьеъ агъа фермайил аверефи ке ппара малар, Акува агъа фермайил — вецар, хIейванар. Са хозяйствойив са мал аркьай, ноябрьдин вазала гIеджизди ая утIаяр фачиянфи джемеIетив ухIас, хуппай майдиъ хаб ирцIанфи. Акуваъ агъа усаъ аяфи са хIа мукьар. Агьал тисаъ Iу этажин мактаб акьуная. Авала гьетисаъ аяфи раттар, акьуна аверефи хьибу-якьу хIа эпелар, йицIуд дегьен сумарин марквар. Iурдана аркьафи йибур, ккитIуна вецарна хIейванар. Колхозиъ кар аркьа инсанар кар фадавай артафттавуйи. ХIурин сельсовет гьер хулаъ верефи фаша агъай некк, ччам са верш — Iу верш хIуькуматин план гьуркIас.  Хулар фидегьен мертти аверефи, джагварди акуруна цалара. Амма авала кирадж адава вегIдайи хулар акуранфи гидж агъаттилди. Аттивас вей хьуна ге Эйхирар агъа мукьуйиъди. Са КIунтIалас ахтт айшугуна дагьариас аттивай хьуная гидж. КIедж агъай хьуная гис, кIеджис ухшар атаф идехIела. Гъилар угас аркьай хьуна адава ги.

Хумбари аттивай хьуная туьлингилди кIетIабурилди хъара ломулди. Гьегисаъ димари кертай хьуна ге гидж зерфеликес, къуттар, ругар кевей хьуна, гидж амилгванди зерфелиъ. Хуппай аккикIуна хьар уцай хьуная, IарчIе кьур суман. Са-Iу сеIети икIухаб ибгIа хьеттиъ ишламиш аркьайи хулар акуранас. Хъара гилди акуранди хьурар, хIешар, айванар, раккаригь гьая цаларин вартталас. Гиджилди акурухаба, хулаъ архьай хьуна са Iайи батIар ниъ, адахъу тукарин суман. Гидж аттивас четин идехIела, суре цалилас ахтт къумалди акуранфи.

Хъехъе тукун укунар

КIил фацунае кIелар хIавар.

Арсуран варе рухарин хьеттар.

Фи ухьтан дува Агъул сувар.

Жавгарат Хамазаева

Добавить комментарий

Ваш адрес email не будет опубликован. Обязательные поля помечены *