Iу агъзурна къана садпе иса гъиликк фацуная Агъул райондин Тпигъарин хIурин Культурно-досуговый центр батIар акьуб. Ме кар арайил аркьаяф «Культура» агъа миллатарин проектин къайдабурилди э. Ме проектин кьастт э, мишттин идарабурин шартIар халкьдин иджвелихъди духIуба акьуб. Ме иса хье райондиъди адина уйи культурайин министр Зарема Бутаева. Хье райондин хIатти агвар акьуне Зарема Бутаевайис ме идарайин хIел. ДехIела Закир Каидованра кумакилди гIачихьуне ме ус батIар акьубан проектигI.
Ме кардин джувабдар иде пешакарарин ахттилатарилди ме идарайин кабинетарин, заларин, агубар кIилди джуьре хьасе. КIилди гъвадар, цалар, джилар ибгIа акьасе. Акьасе мисаъ паровое отопление. КДЦ кедай, ме идарайиъ хъара ая Iу организация. Мебур э райондин библиотекара Историко-краеведческий музей. Миштти идегуна, ме кардин иджвел мисаъ кар аркьаттарис суман ппатталас ачавереттарисра аларгвасе.
Библиотекайин хIаттин Зульфира Магомедовнайин ахттилатарилди ппара иджвел хьасе бицIиттарисра. Фикьас пучин, библиотека — кеппара шиникквар алавере идара э. Мич ачади шиникквар, Iурдана йиркIурас рехIетти ибгIайи экьуна аттвесе.
Музейдин хIаф иде Зухра Ахмедовнайин фикира гьаме э. «Ме ибгIавелдин шартIарилас, цаларин, гъвадарин цIуьппевелдиласра ппара аслу хьасе хье дадарин тарихдин шейъэр ухIуб, мебурин иде – даваф хье хьасмиде несиларихъди (поколение) ахъарукьас акьубан мункине», — пуне ме.
КДЦйин хIаф Камал Магомедовичра рази э ме кардил. «Кар акьучира, гьемишан Iурдин вахттуни ппара мекIер аверефе мисариъ. Концертарин тамашабур акьучира, е алтухъ хъуттурфан инсан авейдава залдиъ. Зе фикирдилди мекIерихъас э пуна йиркIураъ аве зе. Инсан даверехIела че пешакарарисра микIила алучIас кканвейдава тамашабур арайил аркьай. БатIар акьуна ккиркIухаб зейдайи шинихI хьасе сегьнара, ибгIа хьасе залра, Эркьва мукьара, ккегъай сайилас сасра ряд гьавайи ахьасе. Экьуттарис дихьи удигь агвасе сегьна. Кар аркьаттарисра гIешкъ хьасе тамашабур акьас», — ахъакьуне Камал Магомедовича.
Усттабурин курарихъас ахъакьуне МКУ ОКСдинра ЖКХайин хIатти. Шабанов Шабан Абдурахмановича пуне: «Ме дуз акьубарин хIавел фаяф подрядный идара э ООО «Консолидейтед Строй». Че идарайи э гебур, акье пуна, хъучикуна аяф. Кардис пул ачухъ аркьа федеральный хье райондин бюджетари Iударира хъай. ХIа пай э федеральный бюджетин пул, амеф хье райондин кумак. Акьуна ккане курарин са пай арайил хьуна ая, са пай аме. Че идарабурин икьрардихъ хъуттурфуна ме курар ккиркIуна кканди ая ая исан садпе ноябрь верегунас. ЯгIайин ягъанис кар аркьай ая мисаъ якьу устта, хъара магьа адисе усттабурин цIае бригадара. Сувариъ ая мукьариъ Iурдар дахи хъучаве. ДехIела Iайи мекIер веререгунас мебур арайил акьуна кканде. Мишттин идарабурин батIарвел хье райондисра иджвел э. Хьефас аттрукьадегьен хъучушуна кканде хьин хье ватан ухьтан акьас, хье бицIи халкь шад акьас. Фидегьен хьин хье халкьдин Iуьмурдин шартIар ачухъ акьучин, гьалидегьен хье ватанра авадан хьасе».
Салихат Малагусейнова
