Семечккайин тIаб

Семечккайин тIаб — Iеламатин тук э. Гьергелай рагъун багухъ алдаркуф. Хъуттурфучин семечккайин табакI са тук суман  аргва, амма Iэлимари агъа гьер са тукун цIаб рагъун нур э пуна. Зун удигьастти фикир аркьафи семечккайин тlабакI герек ве пуна Iари са ччам акьас,  салатигI гIатас. Амма хулас джурегъилди ишламиш аркьаф ягIафттавуйи.

Ишламиш аркьай аве джерехIвелдис: мухурис, къарфунис, коклюшдис, фунигутIаярис, лекIуьс хъара семечккайин табакIин мерIерин хьетти мертт аркьа джандиъ ая  кьел. Тум хьунаяф э Северный хъара Южный Америкайиас. Гьалдин вахттунис 110 верш джуре ая мебурин.

Аме IуькIерихъ хъуттурфуна тIабакIиъ ая семечккабури фачиянде ацIуна ччам, хуппай уджугуна семечккабурихъ хъаве са батIар кофейин ниъ. Семечккайин табакIин тукариъ ая ппара уьтт хъара воск, идегуна муфеIэт кеяф варварис; хуппай ме тукун цIабарикес руьхьуьна аркьа батIар хъухъе ранг кьумашар рихьес.

Кулак кея усаъ идже вейдава мис, руг рукъуна аве. Хьудегьен ибгIа усариъ узуна кканве хъара ппара ччам хьас. Семечкка узуна кканве цIамцI ая усаъ. ЦIамцIуъ Iаш пара гагьдисттегьен амилгванде. Нагагь кулакар хьухаба мифас цIуппи фацанас ве мерI.

Мукь гIаттивуна кканве дахъуф, кулак кидиркьвагъилди. Амма батIарди рагъ алархьа усагь, ибгIа хьас хъара лам кея ругуъ. Тум узун кканве дуздин мукьуйил, руг бурцIи ами арта, хубджи уьркIи рукlуна уза са тIулулди уркIар акьай. Ме тукун дарукес аркьай аве тIилар, гьучикIухаба конопляйикес акьу тIиларихъай са джуревел авейдава.

Сагелай тум узай аве парникари Iу цIаб хьасттегьен, хуппай мукь духIуба аркьа. Угъа ягъа узухаба, хьед ахъарта сетккайикес. Семечккайин тIаб хъучархьугуна, кьатI аркьай ве кантIулди, ами арта рукъасттегьен. Алгъузуна кканве джакьвар гьучадавес хъара джуре нахширар. Ме вахттуни кулак хьучин идже вейдава, аргIа семечккайин тIабун дар.

Жавгарат Хамазаева

Добавить комментарий

Ваш адрес email не будет опубликован.