Рукъу якк

Рукъу яккун тlегlем ягlаттис, гин кьиматра ягlай аве. Агъулари яккар рукъай аме. Сетябрьдин ваз киркьуф хье халкьди хъучучlа lурдис хlезурвелар аркьай. Кlур, lуькl акьуб кидавай, хизандис lелефра ахъиланде: якк, нис, ччам, хъара сасра шейъэра.

Авал заманайиъ чара адавай вардиш хьуна уйи чlир даверегъилди ахъиянас lеле шейъэр. Хье джилар хlубна мал ппара ая усар идегуна яккра ппара вей э, ппара lелдира э. Дагь заманайин хаб холодильникар аттархьасттегьен lурдис ахъиланф lелеттарикес хlа пай рукъу якк и. Чlетте якк нагагьра ишламиш аркьайдавуйи ямагаригl. lурдис ахъиянас ме девлет инсанди учис lемал джикlине: якк рукъас аркьай хъучучlуне.

Гьалдин вахттари ругъас акьуна ухlайчира, якк рукьасра аркьай аме хье хlурариъ. Рехlетин кар дава ге. Рукъас аркьа мукьара ая, рукъас акьас давере мукьара ая чаравайин, кканчин малдин. Пеша кидавай, алархьуна адава инсандис ппара читин хьасе ме кар кlилиъ гъас.

Фиштти адарцуна кканчин, нае багвар кеттивуна кканчин, кьел фиштти атайчин, фидегьен гагьди кьелаъ икlайчин, нае багвди кейхьайчин – гебур джалла ягlай аве якк рукъа пеша кея инсандис, ге кардин усттайис. Агъуларин яккра, нисра мус хьучира кьиматиъ аяфе.

Гьава сувариъ агъучlу lуькlери, вахттуниъ ай малдихъ хъулан эесси, хlуьлалди руккуна, алдахъуна, йиркlв фай хъучушуна рукъасра акьугуна, ве агъуларин рукъу якк, уьтт суман ширинф. Хlекданди, батlарди рукъуна яккдин килавар сифтта чlетти уйигуналас ке чlукь lутти адархьа. Ге кардихъас рукъас акьу якк кьиматинра багьа ве: гисагl эессин загьматра, рукьуна гулу килаварин кьиматра гlаве.

Камиль Мирзоев

Добавить комментарий

Ваш e-mail не будет опубликован. Обязательные поля помечены *