Руб йирхIубалас зарар адава

Iу исаласра вартт хьуная инсанарил хIевалат хьуна коронавирус агъа азар. Ппара бизар акьуне инсанар ме иттали. Гьалдис уйи итталарин джалгайигI мера гIачархьуне. ЦIайи аттархьуна иттал идехIела, сайисра ягIай адавуйи мин хIел. ДухIттурара, хIа гIелимара лал хьуна гъирхIуне, аркьаф-даркьаф дагIай. Фиштти сагъ аркьайчин дагIай, духттурари башламиш акьуне чиппивас верегъилди гьер джурейин руб-дарман аркьай сагъ акьас. Амма са ппараттарис кумак хьичира, ппараттар кIинара э, Iусеф, джигьилф дагъай. Хабди са вахттунилас джалла гIелимар алучIуна аттивуне ме итталис вакцина. Сифтта гучIай, хъудугъай, иджи руб йирхIас рази давей хьуне инсанар. Са вахттунилас гъавурдиъ архьуне джемеIет ме рубун иджвелин. Руб ирхIуттарис коронавирус хьичира рехIетти алттвейи. Сад гьемиштти руб йирхIуттарикес э Сальминат Магомедовна.
— Сальминат Магомедовна, ассаламу алейкум! Фиштти э вун адеф руб йирхIубан фикирдихъди?
-Ваалейкум ассалам! Дузди пичин, сифтта иджи фачартай давуйи зун ме гьер джурейин ахттилатар итталихъас. Амма вей-вей ппара унихьудегьен, фикир акьас алчархьа, фиштти акьучи иджи эгьан пуна. Хабди, духттурари агъаттарилра йиркIв алийина, гъавурдиъ архьуне зун ме иттал зарафат даваф. ИдехIела са захъас фикир акьуна давуйи зун ме руб йирхIас рази хьеф. Хъара зе хулаъ ая хизанара балайикк кичадархьурай пуна. Зас мебур джалла багьавелди зун рази хьуне вакцинация акьас. А зарара зан ме кардивас хьундава.

Луиза Гусукаева