Гьер йицIу исакк хье хIуькуматиъ аркьа халкьдин перепись. Ахиран перепись хьунаф 2010 иса э. Хаб 2020 иса аркьагъилди икьрар акьунафи ме перепись, коронавирус агъа иттал гIаттина 2021 иса аркьагъилди хьуне.
Ме кар аркьаяф э хье хIуькуматин халкь вартт хьуначин, хъара ахтт хьуначин ягIархьас пуна. Ме кардилди ягIар хьасе хье валаятин хIекимарис фидегьен инсанар аячин, хабди фикир акьасе фи джурегъилди кьайдабур пай аркьайчин инсанаригь. Ме иса перепись аркьагъилди хьуная 15 октябрьдихъас 14 ноябрьдихъди рукьуна. Халкьдин перепись акьуб вазифа э джалла шагьурариъра, районариъ. Джалла усариъ суман перепись акьуб вазифа э хье Агъул райондиъра. Хье райондиъ фи акьас кеячин ме перепись аркьа вахттуни, гьиму инсан гIаячин, хъара сае суаларисра джувабар йине главный специалист-эксперт Агъул райондин статистика отделдин Кубутаева Ханпери.
«Ме халкьдин перепись акьас хье райондиъ дахъасе хьибу переписной участок, гьер участокдиъ ахьасе са хъитIу инструктор, сад ахьасе резервдинфра. Мебур кидавай мисагI гIая 18 переписчикра, мебуринра ая резевдин инсанар. Джалла кей мебур ая 28 инсан, халкьдин перепись акьас хIезурди аттар. Переписной участокар дахъуна ахьасе хьибу хIуриъ: ЧIаъ, Типпигъаъ, Дулдугъаъ. Ме гьер участокдихъ ахьасе хъитIу машин, переписчикар гъареф гьер хIуриди. Ме хIезур акьуна переписчикара гьер участокдиъ ахьасе 6 инсан, амма Типигъарин участокдиъ ахьасе 7 инсан, ме ус райондин меркез идехIела. Участок дахъуна ахьасе МФЦйиъ. Гьер переписчикдихъ хъитIуна ахьасе перепись акьас ушун ккане мехIелабур. Са переписчикдисра ахттигьар адава,чиппис инсанари пе ишкатвелар, хаб джуреттарис ахъакьас», — ахъакьуне Ханпери Кубутаевайи.
