Ме заманайин шиникквар элдетмиш ве тилифанарилра компьютерарил, амма гебурик иджвел суман зарара ппара кея. Дадар-бабарин йиркIвураъ аве, ккандавуйив пуна чиппин вахттарин дурахIелар ягIар акьас валадарис.

Гьалдин шиниккварис авала дурхIа дурахIеларикес хабара кидава. КIвал акьучин ацIуна ая гебур. Тилифанар, компьютерар, телевизорар кехIей хъудава заманайи, шиникквари чиппи чаб элдетмиш аркьайи кIутар шиланди, тумбучаяр, рес-гиштта, цинкIиликIер, учIаф-аттиваф аркьай.

Сад пеф зас кIвал акьас ккандея рес-гиштта аркьагъилди. Ме дурахIел аркьагуна джиркIенди Iу гъван сасуман гьававел аяттар. Алдихьайи гъванарилас гиштта, кичикIуна рес гъайхьуна фартайи хьудегьен вархайи. Нагагь гишттайис йирхIас дахьехаб варф акьуне агъайи. Удигь гъузуф авейи хира ккедикIуна, фату гиштта фацанас пуна. Гиштта фацутти хаб ахъартайи йирхIуттилди.

Нагагь гиштта табаригI гIархьехаб ге гIаттархьеф хIисаб аркьайи, эгера гивас гишттайис хаб йирхIас хьехаб, гьеге гиштта ирхIу усаас хъучучIайи хIисаб аркьай ресалалди. Нагагь ге гиштта гъайхьуна сагелай йирхIухаба сад, Iуд, агъай хIисаб аркьайи, Iугелай аккирхIухаб йицIуд, къад, агъай хIисаб аркьайи. Ахирахъди бахъу хьетти сивигI фацуна гишттара гьуккай фай вейи «чIутту-чIутту» атай гъванаригIди фадихьас.

Батитай Габибулаева