Ягъалас ягъа варха вея хьегьас инсанарин бинайилас мич хьеттарикес ке терсунин, инсанарис зулумар хье дегIви ке Iа инсандин душман иде фашизмайихъай. КIилин якьу истти ушуне ме дегIви инсанвел дагIа иблисдихъай, хабарсузди саламатдилди чиппин курар аркьай, шиникквар хIа аркьай, чиппин багайин ягъ аркьай экьуна инсанарил хIевалат хьеттихъай. ХIаф-бицIиф дагъай гъайшине яракь гъадивас вере хье инсанар хlуькуматин вакилвел акьас.
ГьемебуригI гIуйи че хIададра БицIимазаев (Рамазанов) Рамазан БицIимазаевич, Типпигьарин хIурин идеми. Амма духттурарин маслихIетилди, мин сагъвелдихъ хъуттурфуна, дегIвиди ме гьикундава. ЦIайи гьикуне фашисттарис рекъер хъика хандагар рукIвас. Мисаъ мисра, мин илждешарисра гашар агуне, мекIера, фашисттарин самолётарин бомбабуриккра кичархьуне. Хабди, ме гъвандин усттайин пешабур кеф ягIархьехаб, Iуд рутуларин идемара хъай,гьикуне Рамазан Молотовский областтиди (гьал Пермский край). Мисаъди кIилди Украинайиасна Белоруссиас немцар вере вахттуни заводариас аттиву станокарна дилигар гъайи. Дахъу чулдил алийина, хъитIуна Iекварихъра, гьете ягъа димари башламиш аркьайи яракь хIезур акьас, душмандис цIа йис.
ХIададан ахъакьубарилди, ппара мекIерна гашар агуне мебурис 41- 43-пе исари,фас пучин, мебур е заводарин санаригI гIадавуйи, е ме мукьариъ дуламиш вереттарин санаригI гIадавуйи. Ге бадала мебурис сурсатар хъучаркьаф ахирахъди и, заводариъ курар аркьа инсанарис бегьем хьехаб. ГIулана Iайи гаш алгъазийиб вейдавуйи, амма Iурдана ппара читин вейи. Мисаъ дуламиш вере инсанарин кумак дахьехаб, мункин и гашилана микIила кIиб. Фатуфра кехIей мебур ноябрьдин вазалан ахирахъди ягъцIурна гIуьфудпе иса. ХIуриди адехаб эл йирхIасра кехIей хъучадархьуна ушуне колхоздин маларихъ. ЦIуре хIуригIас гIайчIуна хIурин къирагъил акьуне учис хулар, дегIвин исари хье гIезабари джандин сагвел фаттивучира. Амма са ягъари кар фадавай экьвас вереф давуйи.
26-пе августти 1972-пе исан гуьна верхIеъ учин хуппуриди ачушувусаъ, начагъ хьуна аттфайдевусаъ кIине БицIибагьаларин Рамазан. Ме кIина исар ушухаб дала Рамазанра, хъара ге суман трудовой фронтиъ курар акьуттар хIуькумати гIачихьуф ветеранарин санаригI.
Абдулрашид Рамазанов
