Рамадандин ваз мубарак!

Исламдиъ ая хьибуд багьа вазар. Гебур э Раджаб, ШагIбан, Рамадан. Рамадан хIисабариъ ерчIудпе ваз э исламдин календарьдиъ. Гьер иса Рамадандин ваз йицIу-цIеса ягъанди дахи хъучучIа удигь исалас.

Ме ваз хъучадигуна акьуна кканве исламдин гIуьфудпе шартI ая мисаъ-сив ухIуб. Исламдиъ ая инсанди, нагагь фарз алчархьай аяхаба, ги ме вазала ухIуна кканве сив. Бегьем дахьуна шиникквдил, куметтил, агъдарукьа иттаттил алчархьайдава ме фарз.

Зав курухаб мучIинан къулгунин вахттунисттегьен фера IуьтIуна, ухуна кканвейдава, ппаппрус дивас, хъвехъерариас фи ичинра агъадивас, хумбеттихъай багу хьас ахттигьар адава. Зав курастти гъайшина суьхIуьрар акьуб суннат э. Сив гьартагуна гис агъа ифтIар. ИфтIар акьас ве финик IуьтIуна, некк е хьед ухуна хъара сасра Iелеттарилдира.

Ме вазала аркьафе ппара идже курар, ирцIанфе садакьабур, чIирхIе кураригьас вархал хьас алучIафе. Исламдиъ дагIаяф ягIар аркьафе: къулгун акьуб, кьуръан хурас ягIар акьуб, хъара сасрабура. Ме вазалаъ аве къана ерчIуд е хьибцIур ягъ. Гидегьен гагьди сабур акьуна диндин цIуьппевел акьуна кканве.

Сив ухIай, чIирхIе чIалара агъай, чIирхIе курара аркьаттарис Iаре гаш йибдала хьасттава чиппин джандис, саваб хьасттава.

Хъара ме ваз кими йина кканве закатуль фитр, ге йина ккане вахтт ккиркIва хIаягъан къулгунин вахтт хъучадегуна. ИрцIанфра касибарис, агъдарукьаттарис, хъара сасрабурисра. Ахунин къулгунар акьухаба аркьа таравихI суннат къулгунар.

Iари Рамадандин вазалаъдала аркьайдава таравихI агъа суннат къулгунар, ирхи аркьай хура гебур ме вазалан ахиран йицIу ягъа. Фикьас пучина, ме вазалаъ ая агъзур Iуьшарилас багьа Iуьш Лейлятуль Къадр агъаф. Ге Iуьшуй хье пайгъамбардис садпе сурайин аятар алайкуфе.

Рамадандин ваз ккиркIуна Шавваль вазалан садпе ягъа хIаягъан къулгун акьухаб аркьа хIаягъ. Къуншибур, багунттар сад сайихъди вей мубарак аркьа хIаягъ. БицIи шиникквар чиппин чантабура фай шадтти «Чве сивар къулгунар Аллагьди кьабул акьурай» агъай гIаруца гьер мехIелайигI чиппис къайфат, пичени завал аркьай.

Усттулар, Iуьштти хумбари хIезурвелар аркьай, алацIуна аве гьер джурайин Iелеттари. Гьер ягъа сив ухIай вардиш хьуна, хIаягъан ягъа алтухъ фера акевейдава. Шадвел ппара аве. Джалла мусульманарис мубарак хьурай шагьру Рамадан!

Камиль Мирзоев

Добавить комментарий

Ваш адрес email не будет опубликован. Обязательные поля помечены *