Ппара тIалаб аркьая джемеIетис, духттурари петтар акьуб

Iуьшан багамис кьацIра ибурис ундихьу коронавирус агъа азар гъутуне дуьйил.  Коронавирус – иблис иттал э. Ттиан ис ппара четинф хьуне инсанарис. Ме иттал хIевалат хьуне халкьдил. Сифтта ме азар гъайшиф Китайдиъ и. Уч ме иттал вереф нахширарис э, инсандис хьуна ягIайдавуйи. Ме хIуькуматин инсанари Iелде иланар, Iулар, гIубар. Гьемебур IуьтIу инсандис кедишиная иттал, гьемилас хабди гъайшине кIилди дуьйилра.

Мисаъ инсанар иттархьу вахттра дахьуна башламиш акьуне луькIей. Духттурара аметтар аркьаф-даркьаф дагIай хьуне.

Те вахттуни Китай вархал алди ая агъайи инсанари, хьехъди рукьасттава пуна муш кей уйи. Амма са вахттра дахьуна хье вилаятиъра бадил хьуне коронавирус. Са ягъан арайиъ иттар вейи агъзурарилас вартт.

Ме итталис са хIуькуматихъра хъудавуйи дарман. Иттархьуф фиштти сагъ аркьайчин, фи руб-дарман аркьайчин ягIайдавуйи духттурарис, гьалдисттегьен алчадархьуф идехIела.

Хье хIуькуматиъра ппара хьуне иттархьуттара, кIеттара. Ме иттал гъадивас ппара четин э еш хьу инсанарис, диабет аяттарис, йиркIвар иттаттарис, астмабур аяттарис. ЯгIайин ягъасра яваш хьуна адава коронавирус. Гьалра аме иттаттар ппара.

Хьидана акьуна карантин хъикIуне мактабар, садикар, хулариъ экьуна кар акьас вере идарабур. ХъикIуне рекъер, джемеIетикес акьуне тIалаб алтухъ лазимвел адавай найчра амайчIва пуна. Лазимвел э: дуькандиъди ушуб, хIуькуматин кардилди ушуб, руб-дармандихъди ушуб. Самуз иттал яваш хьуф гIулана хаб башламиш акьуне дархъай хъикIудегьен идарабур. Инсан башламиш акьуне лиханас, цIакIинилди-гамачIилди вес. Хьуне хаб инсанарин контакт, иттаттар ппара хьуне. Ягъалас ягъа ппара вея цIайи иттархьуттар.

Гьеме кар бадала гье Дагъусттандин хIатти Сергей Алимовича Меликова 23 октябрьди адихьуне указ хаб цIуппи алгъурзангъилди инсанарил. АликIуна кканде маскабур, гъиларил хьухьалар, гъилар дизинфекци акье пуне.

Хье райондин гьава фиштти ая пуна ме кардихъас хабар гъушуне и.о. Агульской ЦРБ Муса Кубутаевич Мусаевафас. Мин чIаларилди, хье райондиъ алтухъ иттаттар адава. Положительный результат ая инсанаринра гьава иджи ая.

1 сентябрьди дахъуна уйи хье больницайиъ ковид-госпиталь. Тегуна уйи муяд пневмония хьуттар, ерхьид положительный ковидин результат хьуттар, якьуд вероятный ковидин результат хьуттар, хьибуд ОРВИ хьуттар.

Алттушу хIефттайи Iуйинсара адине положительный результатар. Мебурин гьава иджи ая, хулариъ экьуная инсанарис кеддишас. Мебурихъай контакт хьуттара атуная хулариъ.

Хье больницайиъди адиная хIаттаринра бицIиттарин гриппин прививкабур. Ккандеяттарифас хьасе ушуна акьас ме прививка.

ЯгIайин ягъас Муса Кубутаевича ппара тIалаб аркьая джемеIетис, духттурари петтар акье пуна. Фидегьен сасра алгъузучинра, гьерттис иджи ягIа учин джандин хIел. БицIиди дехIера ме итталин симптомар агухаб, пуна кканде духттурарис. Джинар акьуна хулариъ экуна хъара Iайи далара вейдава. Вахттуни акьу руб-дарманихъ хъучархьаф адава.

Луиза Гусукаева

Добавить комментарий

Ваш адрес email не будет опубликован.