Дуьйин варттал инсандис ая гьер джурейин иджвелар. Авалан вахттарихъ хъуттурфуна агьал инсанарис хьуная ацIуна рехIетара. Ягъархьуная гьер джурейин Iемалар джандис азият дайес. Са гIуьфцIур-ерхьцIур исан кьабахъди фикир акьуна кIвал акьучин, ягIайин ягъас гьегидегьен духIубавелар хьуная. Гьете вахттуни инсанарин йиркIураъ хиялра кегьей ирхIайдавуйи мишттин рехIетар, иджвелар хьасе пуна.
Ке хIа иджвел фи э пуна хабар гъушугуна хIа инсанаривас, чIал сад акьуттари суман джуваб ирцIанце хье хIурариъ Iеквар хьеб. Ппара четин Iеквар адава вахттар ушуне инсанарилас.
Агьалдинттарис хIикатар суман ве те вахттарихъас ахъаркьагуна, фиштти яшамиш вейчина инсанар. МучIе хьухаб инсанари кикIвайи тIубун лампабур ахъатуна кIаре нафттра.
ТIубун лампабурин кьабахъай аттархуне шуша але лампабур. Мебурихъ ахъартайи керосин. Нафтт ахъартаттари Iайи кум фартай, хал кIаре аркьайи. ДехIела шуша аликIа лампабур аттархьухаба тIубун лампабур инсанари ишламиш аркьайи салариъ, хьурарикк.
МучIе хьухаба инсанари кикIуна лампабура хулариъ эркьвайи. КикIуная хулаъ лампайихъас хъуруцуна аверефи шиниквар чиппин дарсар лиркIенди, хурай. Те вахттари инсанарин ке идже мурадариъра кегьей авейдавуйи хулариъ ттукун Iеквар хьасегьан пуна.
Сифтта хьуне кикIвай-керта вахттар Iекварин. МучIе хьухаб куькIвайи, Iуьшан цIесайис хаб кертайи. Амма сагелай кетастти инсанарис хабар ирцIанфи, хьибугелай кикIвай-кертай Iеквар. Инсанар тегIди верефи Iеквар кертагунас чиппин хIезурвел акьас. ЦIесайи кетугуна хаб кикIвафи кьабахъ ягъа мучIинангуна.
Гьемишттинттар аркьай ацIун исар хьуне. Хабди и хъучучIуф дивас кедарта Iеквар. Iеквар хьухаб инсанарин шадвелдин кьайда адавуйи. Яраб милас иджеф аягьан пуна хиял вейи инсанарин. Гьемебур хьучинра ацIун исар хьуне инсанарин хулариас лампабур аттдихьай. Iеквар кетуфна сад лампа кикIвайи. Гьал ме кардис инсанарис ая шамар, гьер джурейин Iекв ича фанар.
Iеквар дивухаб хьуне инсанарин хулариъ телефонар. Джаллабурин хулариъ адавуйи мебура, айчинра аяттин хулаъди веререфи байирарихъай гъургъас.
Мебурихъди дивуне хулариъди радиобура. КIилин хIефттайи гъузуна аверефи инсанар лезги мегънибурихъ. Радиойиас вере передачабура хIапай лезги чIаланттар и. ДехIела и тегуна Iуьрус чIал далара хIапай инсанарис ягъайиф лезги чIал. Радио аяттин хулаъди завал верефи кьуншибур, багунттар футболил, мегIнибурил йиркIв алиянас.
Хабди аттархьуне телевизорар. Ппара тамаш хьуне шиниккварис телевизордил. Фиштти учIунафегьан агъайи бицIиттари хIа инсанар цIадал ишигиъ.
Тегунанхаб алттушуная ацIун исар. ЯгIайин ягъас инсандин Iуьмурдиъ хьуная хъара джуре духIубавелар. Гьерттин хулариъ хьуная ругъуфра ибгъа хьеттар, кунар IуьрчIан машинар, интернетар. Са чIалалди, рехIетар хьуная инсанарис.
Луиза Гусукаева
