Нурадин Ибрагимович Магомедов

Нурадин Ибрагимович хуф э 1923-пе иса 22-пе апрельди Типпигъарин хIуриъ Агъуларин райондиъ. Ерхьи ис хьехаб, ушуне ге Типпигъарин махьтабиди. 1939-пе иса, махьтаб ккиркIухаб, ушуне ге хурас Дербентдин педучилищейиди. Гисаъ хурай ая вахттуни, 22-пе июньди 1941-пе иса хъучучIуне дегIви. Джала цIемуя ис хьуна шиникквар СССРдин гъайхьуне дегIвиди. АцIуна шиникквар, цIемуя ис дахьеттара кехIей, хьеттара вей хьуне чаб чиппин кIилилди дегIвиди. Магомедов Нурадин Ибрагимовичра хьуне сад гьегебурикес, хуравус ккиркIугъилди, кар акьасра хъучадархьуна, учин кIилилди ушуф дегIвиди душманарихъай укъас.

1942-пе иса ноябрьдин вазала Нурадин Ибрагимович, немцарихъай ачукъугуна Южный фронтиъ «Лысые горы» агъа мукьуйиъ Краснодарский крайдин, киркьуна душмандин яракьиас, архьуне госпитальдиъ Цыхантубы агъа шавурдиъ. Гидас хаб ушуне ме дегIвиди. Ппара усариъди дегIвин рекъери файшуф э ме.

1944-пе иса аттархьуне садпе Белорусский фронтиди. Гебури ачукъ акьуне фашисттаривас Польшана Восточная Пруссия. 1945-пе иса хьибудпе майди гьучархьуне мебур американцабурихъай Эльба агъа нецIухъ. Уч дегIви ая вахттуни Нурадин Ибрагимович хьибугелай архьуне госпиталариъ, киркьвай немцарин гулабур.

Мин зурбавел душманар къилмиш акьубахъ хъуттурфуна, хIуькумати йине мис ппара джевизар — орден «Отечественной войны» 2-й степени, орден «Красной звезды», орден «Трудового красного знамени». Гебур кидавай, гис йине медалар «За отвагу», «За боевые заслуги», «За победу над Германией» агъаттар.

ДегIви ккиркIухаб адине ме хаб учин хIуриди. Акьуне ми учис хизанра Тамам агъа руш, уч суман гIеджиз хизанаринф. Хабди Нурадин Магомедов курар аркьай хьуне гьер идарабуриъ. Ге и сагелай завучетом РК ВЛКСМ Агъуларин райондиъ, хабди и участковый Агъуларин РОВДйиъ, кумакчи Агъуларин РК КПССдин секретарьдин, райсоветин исполкомдин председательвелди. Хабди гикес хьуне Агъуларин райондин РК КПССдин садпе секретарь. Ахирахъди Нурадин Ибрагимович кар аркьай хьуне Народный контролин комитетдин председательвелди. Пенсиди ушухаб, кар аркьай хьуне парторгвелди «Тпигский» агъа совхоздиъ.

Уч Нурадин Ибрагимович Магомедов кIине 2005-пе иса. Чиппин джалабурин, дегIвин гIезабар агуна дуньяйилас ушу инсанарин гунагьар гIеф акьурай! Хьес дегIвибур сара дагурай!

Нафият Шамсудинова

Комментарии закрыты.