Рамазандин вазала хьес ппара унихьа «ифтар» агъа чIал. Ифтар э Iерабарин чIал, хье чIалалди ифтардин тарджума э сив гьатас. Авала гьертти учин хулаъ аркьафи сив гьартаттар унахъуна багун-кIиларис. Кьанди мусульман халкьдис хьуная мункинвел хъара хье гIедат хьуная, багьа Рамазандин вазала акьас лап зурба ифтарар шагьурариъ, районариъ, хIурариъ, гьер мехIелайиъ мишттин маслихIетин, савабин маджлисар акьас. Хьес ягIа, цац четин хьуне инсанарис, ифтарар кедай хIаягъаракей акьас хьундава. Фас пучина коронавирус агъа итталин пандемия хьуне дари дуьяйиъ. Хъара шукур Аллагьдис, ме иса хьуне мункинвел гьер мукьариъ ая мусульман халкьдин инсанарис акьас ифтарар. Ме иса Москвайиъна Петербургдиъ дуламиш вея агъуларин хьуне зурба баракатин ифтарин маджлис. Ме маджлис акьас багьана хьуне хье Рамазандин ваз, кумак акьуне хье Дагъусттандин Муфтияти, хъара хье агъуларин представителяри дуламиш веяттари Москвайиъ, Петербургдиъ,  гебур Галимов Рамазан Джабирович ЧIаарин хIуриас, дуламиш веяф Москвайиъ, хъара Исаев Шахбан Арсугъарин хуриас, дуламиш веяф Петербургдиъ. Садпегелай дава мебури аркьай мишттин зурба маджлисар хье агъуларин джемеIетис. Цацан ис кедай гьер иса акьас алучIа. Ме ифтарихъди ушуне хье Агъул райондиас председатель совета имамов АхIмад Гарунов, хъара ХIаджи-Ибрагьим Курбанов — Каспийск шагьурдиъ ая мазгитан имам. Ме шагьурариъ ифтарихъ завал хьуне хье агъуларин меценатар. Гъадивуне инсанарин йиркIвар. Рамазандин ваз багьана хьуна, хье инсанарис мункинвел хьуне завал хьас, баракат хьас, ислехIвел хьас. Кам дахьурай агъул джемеIетин арайиас мишттин маджлисар.

Наибет Гасукаева