Ме итталис зарафатар ягIайдава

Ме коронавирус иттали учин азар кидиркьу са инсанра артагъилди адава. Гьер са вахтт ккетвей хаб цIае тур але вирус аттархьа. Агьал гъургъубар ая штамм «Омикрон» агъатихъас. Гьер джурейин турар йичира, ме итталин тур сад э, фишттира хье гьавайигIас гIадайчIваф. Гьер ягъа хье ватандин кIилил гъузу хIаттари тIалаб аркьая инсанарикес садтталара вакцина акьуб, хъара хьедегьен эхIттият акьубра. Ягъалас ягъа адихьа гьер джурейин кьайдабура. Ме кардихъасра ппара читин хьуная инсанарис. Дуканариди, идарабуриди ачаверегун акьун ккане кьайдабур маршруткабуриъра акьас алчархьа.

Ме акьун ккане кьайдабурихъди инсанар вардиш хьуна айчин, адавайчин, зас джувабар йине маршруткайиъ гьер ягъа инсанар фай ахттна вартт вере Рамазан Гусейнова. 

Мин чIаларилди, сад суман сад вейдава, маскабур чиппи димари эхIттият акьуна гьикIаттара аве, гьикIас даккантара, фадаттара. Гьегиштти суман руб йирхIуттара, дирхIуттара э. Амма удигьай суман андава инсанарин фикир. Ке цIайи ме итталихъ хъугъаттар дала хъудугъаттар ппара уйи. Агьал аргвай-даргвай джуре хьуная инсанарин фикир. Маршруткайиъ агъучIай ами нагагь гъил фацуна салам йихаб, хIеракат акьуна, аттивуна антисептик, ичас алучIа. Маскабура гьикас алучIа, итталихъас суман, гьудаваттарис нагагь рекуьъ гъурзар акьучин полицибурира джазабур аркьа. Инсанарис суман засра чIал кеттархьа.

«Зе джибинисра дирхIурай пуна, инсанарисра зарар дахьурай пуна, фадаваттилди ирцIанчира зе машиниъ ягъди аяфе пачкадалди маскабура, антисептикра. Мертвелихъас гъургъучин, гьер ягъа ахтт ушуна адегъилди Iуьрчанди аефе машинин гIан, гьеме итталар хьасттира, хьехабра. Зун бадала, захъай са машиниъ ая инсанарисра, инсанарикес засра, хабди зе хулан хизанарисра ме иттали зарар дайирай пуна, зун рубра йирхьуная. Зе фикирдалди, гьер инсанди учи фикир акьуна кканде учихъасра, учин багулив фаеттарихъасра. Зун зарафатар акьучира, ме итталис зарафатар ягIайдава», — пуне Рамазана. 

Батитай Габибулаева