Малдин къадагъа акьуна кканде

Сувариъ аркьа кар загьматинф э. Мисариъ дуламиш вей ая халкьдис ягlайра э ге загьматин кьимат. Инсан кlилин истти лиханде тич адаркай, мич адаркай, учин дуламиш аркьай. lурдана чlукь рехlет хьучинра, хьид фачадаркугъилди суварин инсанар хъучучlа загьмат дивай, ге учин хlуькуматин аркьай ая кар кедавай. Нандиъ хьучинра загьмат дакьухаба вас аяфттава lелеф.

Ттиъ коронавирус агъа иттал фачадаркуф, ариш-вариш акьас вес четин хьуне, вун дуламиш аркьай ая усаас байирдиъди вес верегъилди адавуйи. Ге кардихъас инсанди, хаб учин дуламиш бадалди, фачучlуне хуппурар узас. Чlире хьу хуппурар ппара айчинра, те исалас ттиъ ппара даркубар акьуна чар, гlуяр халкьди ппара узуна ая.

Мехlсул масса ицlан дуьканчибури шагьидвел аркьай уйи ме иса гебур чиппин ппара хъаттушуне агъай. Ул фатугунара аргвайи фидегьен манзилар даркуна кlаре акьуна айчин, чlир йирхlуна ая мукьарин фидегьен язан акьуна айчин.

Алттушуне ягъара, гlул хъучадине, узуттара кегъучlуне, амма мал-къара кам хьундава инсанди джафа дивуна узуна ая хуппурарилас. Сайи джафа дивай ая, сасрайи гин загьмат пуч аркьай ая, хlисабикк ккидава тlул аркьай. Мал адикаттис хуппурарихъди аргвай ая кегъучlуна ая гlуяр, чар, фас ичин гидегьен хlисабикк ккидавай чlирхlе кар аркьаф.

Авалан вахттарихъ хъуттурфуна, ухlа мал чукь хьуна чlирар булди ая, адикас вей ая якьу багухъди. Хьес аргваф багулиф фая ус э. Хиял акьасе ге чlир цулана чиппин малари даlуьтlуна атасе пуна. Ая вархахъди адикуна ая мал, керхьуна, учин вахттуни хаб дакьуна дивуна хуппурарихъди вереттар, ая дихьи хуппурарилди адикаттар. Гьинара чlал агъай адава. Е хуппурарин эессибури, е хlуькуматин курарил але ге курарин къайгъубур акьуна кканеттари — хlурарин хlаттари, хъара гебурис кумак акьуна ккане сасрабурира.

Хьимудна сайи пуна ая зас гlерзабур аркьай, мишттин четин кар ая агъай. Засра тlалаб аркьай аяф инстаграмиъ ихьурай пуна инсанарис, маларин эессибурис, хъара сасрабурисра кетlурай пуна. Хуппур узуттаригl касибра гlаве, вахтт адавафра гlаве, гишттин келхъен курарикк ккихас даверефра гlаве. Касибтти рукъал фатасе, сабур хъадаваттиас са хатlара аттархьасе — ппара дакканвелар хьуб мунким э судариъ учlасттегьен.

Зас ягlайдава сасра хlурариъ фиштти эвел аркьай айчин мишттин курарин, амма Тпигъарин хlурин хуппурар гьеммиша мал кам давереттаре ацlуна исари, учра дихьи хlуригь гьучадархьу джилар. Са пай эессибури чарабур аркьай, дузуна ая хуппурар уцасдехlера, узуна аяф кегъучlурай пуна чапарар ирхlуна къадагъа акьуна ая мал алчадавес, ге кардихъ хъчудушу халкьдин хуппурар lелдира, lуьрджандира ая. Гьинас кканхьасе мишттин кар? lари ге хуппурар lеле маларин эессибурис.

Гиштти давуйихаба гьертти учин малдин эвел акьаси. Ая гьер хlуриъ бинайин хlа малар, урчар, хlуппар адика чlирар. Фикьас э гич аттдикаф? lурдин чlир сад, гlулин чlир сасра хьуна кканде. Инсандин загьматил муркl алишидегьен чlевене, малдин кьадагъа акьуна кканде!

Камиль Мирзоев