Махьтабариъ шиникварин хурубар ккиркIуфна сад, джаллабурин фикир ве махьтабар сентябрьдин вазаласттегьен хъикIагьан пуна. Амма ахиран звонок йирхIуф, шиниккварин экзаменар алттархьухаб, хъучучIа хIезурвелар акьас хаб хура вахтт хъучаверегунас. ГIулин каникулари хье хIуькуматиъ джалла махьтабари, Агъул райондиъ гьер хIурарин махьтабари хъучучIа аккуьшу багвар дуз акьас.

15-пе июньди хьуне ахиран ОГЭ. 1-пе июньди джалла мегIелимар ушуне отпускариди, 28-пе июльди мегIелимар хаб айчIуне чиппин курарилди гIулин лазим иде курар арайил акьас. Августин вазалан сифтта ягъари Типпигъарин хIурин махьтабиъ хъучучIуне курар. Ме иса Типпигъарин махьтаб капитальный ремонтигI гIачархьундава, фас пучин, вере цIае иса фикирди ая цIае махьтаб акьас 300 мукьуйинф.

Махьтабариъ аркьая гIулин курар арайил акьас, мегIелимарис кумакис ве дадар-бабара. Гьер иса хьибу ягъан арайи акьуна ккане акурубар, ширар йирхIубар пуларис, тIагарарис кумак аркьа чиппин багухъас дадар-бабари.

Ме кар гьаттархьухаб, дадар-бабар хъучучIа хIезурвел акьас махьтабари вере вахттунис аликIа кан, лек, хъара лазим иде шейэр гъушанас. Исалас иса кьиматар гъайшайчира, фидегьен дадар-бабарис пулун читинвел айчира, шиникквар хIезур акьуна кканде. Алттушу иса махьтабиди вере шиниккварис хIезурвелар акьас хье хIуькуматти фатуна уйи пулун кумак гьер шиникквдин кIилил 10 агъзур манат. Ме иса хIуькуматтин къайдайилди пулун кумак рукьая садпе классиди вере шиниккварис, хъара гIеджизвел ая хизанарис. Мишттин кумакар кидавай, хъара хьуная цIае къайда хIуькуматтин шиникквар ая хизанарис пулун кумак гьер иса 8-исалас 16 ис хьасттегьен.

Миштти идегуна, махьтабари вере вахттунис хIезурвелар акьас мегIелимари суман хъучучIа дадар-бабара каникулар хъучучIугъилди.

Наибет Гасукаева