Магомед Омаров: «Зе Iуьмурди хье район хIисабикк акьуна, ади хIаттарикес сад-Iуд дала хьуфттава»

ЦIеерчIудпе апрельдиъ хье райондиъди адина уйи Дагъусттандин хIаф Сергей Меликов. Инсанарис иджвел хьас къайда буйирмишар акьуне ги. Ме кардихъас учин фи фикирар айчин ахъакьуне Типпигъарин хIурин яшунин хIа инсанди, райондин старейшинабурин Советин председательди Омаров Магомед Рамазановича.
— Магомед Рамазанович, чве фикирдилди фиштти аргва чвас Дагъусттандин хIаф хье райондиъди адина, цIае мактабар аркьагъилди кумак акьасе пеб?
— Зас ме кар лап кьабул хьуне. Фас пучин, зе Iуьмурди хье район хIисабикк акьуна, ади хIаттарикес сад-Iуд дала хьуфттава. Гьер са бицIи районарин дарди-бала, тIалаб ягIархьас хIаттар хIел-хIел аркьай аларуцай иджи э. Четинвелар адава хIурар, районар авейдава. Магьа хье Типпигъарин, Гъудгъуларин хIурариъ буйирмишар акьуна ая кумак аркьагъилди цIае мактабар гъадивас, Гъудгъуларис цIае садикра.
Сад далара хье хIуриъ кканди уйи цIае мактаб. Зунра гьеме мактабиъ ацIун исари директорвел акьуфе. Амма авалдин мактаб ухшаринф ичира, хIейифтти айчира, цIаевелара кканве. ЯгIайин ягъас сасра мактабариъ ая рехIетвелар хьес адава. ЦIае мактаб акьучин рехIетра, ибгIавелра ппара хьасе шиниккварисра, кар аркьая мегIелимарисра. Агьал мактабин гIанаъ адава хьеттар, шиниккварис алчархьа вес булахариккди. Гуни Iеле ус варха э шиниккварис, Iурдин вахттуни ибхьиас вес алчархьа сасра багухъди. ЦIае мактаб акьучин, гьемебур джаллабур найчра душуна гIанаъ хьасе. Ме ахттилатил зун ппара рази э.
ХIа чугъ сагъул хьурай Сергей Меликовас ме кардихъ хъучавеяттис. Ме ахттилатар кIилиъ рукьас акьучин ппара идже хьасе.

Луиза Гусукаева

Добавить комментарий

Ваш адрес email не будет опубликован. Обязательные поля помечены *