Курар арайил хьас кумак аркьа МФЦйиъ

МФЦ агъа идара дахъуна хье хIуькуматиъ
ппара исар дава. Ме идарабур арайил акьунаф, инсанарис чиппин ая курарин кIеджар арайил акьаc четин дахьурай пуна. Мебурин идарабур ая хье хIуькуматин гьер шагьурдиъ, райондиъ.

Агъул райондиъ МФЦ агъа идара дахъуне декабрь вазала 2015 иса. Ачмиш акьу ягъалас мич ме идарайи кумак аркьая хье райондин джалла лазимвел ай чиппил алчархьу курар арайил аркьа инсанарис. Ме идарайиъ кар аркьая инсанарин ая гьертин учин вазифа.

Кьанди, 24-пе майдиъ ме идарайи хабар
йине, каникулариъ ая шиниккварис мункинвел ая пуна, МФЦйиъ арайил аркьагъилди путевкабур лагерариъди гьикас. Ме путевка ирцIанде Дагъусттандин образованин Министерствойиас, йиная мукьар хье райондисра. Миштти идегуна, дадар бабарис ая мункинвел гьикас гьерттис чиппин шиникквар лагерариъ.

Дагъусттандиъ ая гьер джурайин
лагерар: «Солнечный берег», «Сосна», «Березка», «Орленок», «Костер», «Планета». Хъара хье райондин МФЦйи арайил аркьая лазим вере кIеджар, шиниккварис ирцIанди ая пуларин. Алттушу иса, инсанарил коронавирус агъа иттал хIевалат хьу вахттуни, хье хIуькумати кумак акьуне пуларилди.

Шиникквар хъая хизанарис, хьибу исалас ери ис хьасттегьен, ая ирцIан пулар. Ме кардихъ гьерф уч хъучушуна кканде. Фас пичин, гьер хизандин кIилил алчархьая пулухъ хъуттурфуна ирцIанде ме пул. ДехIела, са ппараттарин фикирдиъ аве, хулаъ бицIиттар ай фера дакьуна адисе пуна манатар. Гьинас фидегьен алчархьайчин, фи рукьайчин, авала суман джалла идарабуриъ душуна, адина МФЦйиди ягIар акьас ве.

Мебур кедавай, агьал арайил аркьая хъара дад е баб адава хизанариъ ухIая шиниккварис сасра манатара. Августин вазала мактабариъ ая шиниккварисра хIуькумати кумак бадала йисе пуная пулар. Шиникквар мактабариъди кичаверегунас хизанарис рехIет хьурай пуна.

Гьеме курара, хъара сасрабура арайил хьас кумак аркьа ягъа МФЦйиъ. ДехIела инсанарис ппара идже хьуная ме идарабур хьеф. ДагIа суалра, аркьа кардисра са усаъ арайил акьас кумак аркьа.

Наибет Гасукаева

Добавить комментарий

Ваш адрес email не будет опубликован. Обязательные поля помечены *