5-пе декабрь волонтерарин ягъ э. Волонтер – хье чIалалди чиппин гIешкъунилди джемеIетис кумак аркьа инсанар э. Инсанарис сур – сурин кумак гьеммишан лазим э. Мус хьучира ягIайра и ме кумак акьас. Амма мишттин кумакчи волонтерарис кIилдин хIаягъан ягъ акьуна лидегьен ппара вахттар дава.
ХIаягъан тарихдихъ хъуттурфугуна, алтухъ ерсеф дава ме. Са агъзурна ерчIу вершна муйцIурна гIуьфудпе исан гIуьфудпе декабрьдихъас мич э ме хъучучIунаф. ООН-дин Ассамблейин икьрарилди аттивуне ме ягъ. ХIаягъ джигьилф ичира, даража мин хIа э. Джалла миллатари, ацIуна хIуькуматариъ къаршиламиш аркьа ме хIаягъ. Хье хIуькуматиъ къаршиламиш акьас хъучучIуне Iу агъзурна цIееридпе иса. ЯгIайин ягъас Российиъ ацIуна гьер джурейин организацибур ая. ГIешкъ ая инсандивас найисагI кканчира гIачучIуна, учифас вере фи кумак ичира акьас хьасе. Кканчи гьемишан, кканчин са-сагелай. Хьин гъавурдиъ архьугъилди, ке герек идеф инсандин кьасттна джумарт йиркIв э.
Ме волонтерарин хIаягъ учинф э пуна хIисаб акьас хьасе йиркIураъ рехIми ай, учин вахттна загьмат гIегвал давай, джувабиъ ул адавай, инсанарис иджвел кканди, учифас аттрукьая са бицIи кумак дехIера аркьа инсанарифас джаллабурифас.
Ме хIаягъ акьунафра э джемеIетис ягIархьуб бадалди мишттин джумарт йиркIвар хъая инсанарихъас, нагагь хъара мишттин иджвелар акьас кканеттар айчин, мебурис фи фиттихъди ичин ягIархьас. Ме инсанари хье джемеIетин кIилди багварик чиппин иджвелин, кумакин пай кикIа, дехIела мебурин кар фикир дайина артас вереф дава.
Гьал, гIедат идегъилди ме ягъ къаршиламиш аркьагуна, са ппара гъа гьер джурейин мегIракабур: флеш-мобар, конкурсар. Мебур кIилди аркьаф джемеIетис иджвелна хайир гъас ккане инсанар бадалди э. Гьелбетта зейдайи аркьа благотворительный концертар, хIаягъан мегIракабур. Ме ягъа хъара Iайи алучIа инсанар иджвелин курар акьас, багулив фаттис кумак акьас, са игитвел акьас, са чIалалди, волонтерарин чиппин кIилин Iуьмурдин пешабур агвар акьас.
Нагагь ме пешайихъди багу хьас кканеттар аяхаб, са фикира дакьуна гIачучIас хьасе мишттин инсанарифас волонтераригI. Ке удигьай мебури ягIар акьуна кканде, чиппивас нае багус кумак хIекьданди акьас вей айчин. Фас пучин, ме кардилас хIа пай хабдин кумакин иджвел асулу идеф. Нае багус пугуна, ме агъа чIал э, нагагь Iуссе инсанарис кумак акьас кканчин, иттаттарис кумак акьас кканчин, е дахьучин хIейванарис, нахширарис кумак акьас кканчин, хъара джуре шагьурариди ушуна, тисариъ кумакар акьас кканчин. Фиштти ичира, ме кардихъас ке удигьай фикир акьуна кканде гьер са инсанди.
Гьер инсанди, учивас аттрукьа багв гIаттивухаб, ликIина кканде гIерза. Мебурин гьер са джуре кумакин рекъуьхъ учин идара хъаве. ЧIукь хIа суман идарабурихъ мункинвел хъая онлайн гIерзабур ликIибан. ГIерза ликIичира, хьин хIезурди ай кканде хье гIерза кьабул дакьубахъдира. Мич кьабул аркьа инсандихъ хъай кканде джандин сагъвел, йиркIуран цIуьппевел, келлайин ачухъвел.
Гьерттис дахи димари ягIай кканде, фидегьен вахтт, гудж, учифас ме кардис ишламиш акьас хьас ичин. Хъара герек э ме ягIарвел, нагагь инсандихъ учин джуре кар хъаяхаб. Хурубара кехIей акьуна кканде ме кардин рекъуьъ. Фас пучин, сур идарабуриъ бицIи-цIури чиппи гъавурдиъ ихьучира, аве сур идарабур батIарди ягIарвел хабар гъушуна, ахтармиш акьуна кьабул аркьаттара.
Ме исан хIаягъа Махачкала шагьурдиъ грамотабурна джавизар йине къана Iудпе исан арайиъ иджи кар акьу волонтерарис. Ме мегIрака арайил акьуне РД-йин Минмолди. Мишттин чугъсагъулар кьабул акьуне мегIракайил гIуьфцIурна хьибу волонтерди.
Хье Агъул райондихъас гъургъучин, мисаъ волонтерарин курар ягIархьуна Iу агъзурна цIегIуьфудпе исахъас мич.
Сиражудин Шамсудинован чIаларилди, хье райондин волонтерарин организацигI гIая хьибу верш инсандилас вартт. Мебурикес хIа пай э махьтабариъ хурай ая шиникквар. Мебури кумак аркьа гъалибвелдин, экологин, спортин хъара ацIуна джуре мегIракабуриъ.
Махьтаб ккиркIуна хурас ушухабра, мебури кумак давам аркьа хабди шагьурариъра. Мункин кар э хьеал найил кканчира алчархьуб четинвелар. Амма инсан садтти атуна ккандава ме четинвеларихъай. Дусттвелна дуньяйин ислехIвел бадалди сур сурис кумак акьуна кканде инсанари.
Салихат Малагусейнова
