Куче гъван

Дуламиш вей хьуная са къуджа. Къуджа хьуная Iуссеф, аркьай хьуная ги фурдагъ. Къаравулвел аркьай хьуная колхоздин багъдиъ, гьегиштти Iу-хьибу манат аркьай хьуная учис дуламиш акьас.

Хъуьсуйил алхьуная гин хIа ишан. ХIададахъ хъуттурфугуна, гин хъуьсу элхъенди айчиракегьей, аргвай хьуная хъучадивуна. Шиникквари ягъди бизар аркьай хьуная хIадад.

Са ягъарикес са ягъа Кьулбан агъа киIркI учIуная багъдиъ хъадикIенас гьечар. Къаравул агуф, яхI акьуна гьишас хъучучIуная ме.

Хъукъуная къадакъихъ гIархьуная уьттарарин кIуранигI. Аладивуна джанар, адархьуна иъ гIайчIвас вей ахьуна адава ме кIиркIафас. ХIуппалан рудж суман ахьуная кIиркIан шалвар чIургъуна. Къаравулди чIалра дапуна гlаттфайдина, гьика кIиркI хулаъ йина гьечара.

Хьуная кIиркIас ламус, ушуная ме дараъ, гьачархьуная Iуьр. Агуная мис IуьрагI са гъван, экьуная ме гъвандил шалвара хьуна. Iэшалин вегIра хъай гъайшиная кIиркI варвура хутI икьуф суман. Хъуттурфуная ме — варв дава, куче гъван э. Гъвандик ликIина ахьуная:

Гьеме гъван сувал алгъафайшутти.

Сувал ягIа атIуттис

Йисе хаб джагьил Iуьммур.

Дуламиш хьасе цIайи.

Гьеме балайиккес печать хьуна адава гъвандик кеяф, якьуд плюсар, хьибуд хатIар, кIаш кехьуная хъара улуд ае якьуд запятаябур.

Пушмал хьуная Кьулбан. ХIейифе, зас кIилди ярчIу ис э. Фиштти э бицIиттаригIди вереф. Аркьай фикирар вей хьуная Кьулбан, агуна мис вей къаравул, аркьай мухура, кедагъуна кираджин бадрара, гIунинкIилил алийина кIашра чаппра аларджуна. Идже фикир архьуная Кьулбанан йиркIураъ, гьара зун пасе ме хIададас те гъвандихъас, хьасе микес джагьил.

ХIадад йиркIв алийиная Кьулбанал. Чухъсагъул зе хуттул, къаравулвел ами атуна Iуьр ая усаъ вес хьасттава зафас. Зун ушухаба ме багъ аккетасе шиникквари.

Добавить комментарий

Ваш e-mail не будет опубликован. Обязательные поля помечены *