Инсан фиттихъди хьучира дахи вардиш ве. Миштти агьалдин вегIдайис вардиш хьуная джемеIет коронавирусдихъдира. Амма ме итталин ахттилатара, иттархье инсанара кам вей адава. Ме иттал аттархье вахттунилас хубджи вахттар хьуная. Инсанарин сифтт хиял хьуне ме иттал чиппис киркьасттава пуна. ЯгIайин ягъас нагагьра унихьай андава час хьундава агъаттар, фас пучин, хIа -бицIиф дагъай, садра ме иттали ккетундава учин гIезабариккес. Ппараттарис гудж йине ми, хъара хьуне кIеттара. Инсанар кIес башламиш акьухаб э хIа пай инсанар хъугъуф, эхIттиятар акьас алучIуф.  Хъара читин хьуне инсанарис коронавирусдин вакцинайихъ хъугъас. Айчира, сайи-Iуйи рубар йирхIуна иджехьеф, аметтарира башламиш акьуне вакцинация акьас. ХIапай джемеIети руб йирхIухабдала ме итталин гьава яваш хьундава. Гьалра ппара тIалаб аркьая духттурари инсанарикес, джандин сагъвелдихъ хъуттурфуна, ахттигьар аттарис вакцинация акье пуна. Агьал иттал яваш хьуна аргвайчира, ме мункин э хаб бадил хьуб. ДехIела джаллабури учин сагъвелдихъасра, аметтарин сагъвелдихъасра фикир акьуна тIушуна кканде ме кардихъди.

Л.Гусукаева