Кканди аяф акьу кардин дуздин ахир хьуб

ХIуькуматин гIанаъ ая гьер джурейин лазим иде идарабур. ХIа шагьурариъ са вазифа аркьа идарабур Iу-хьибуд авейчин, бицIи районариъ мебур авереф са-сад э. Сад Iайи инсанарин герек вере идарабурис ЖКХ э. Хье райондиъ ацIуна исар э кар аркьай муниципальное бюджетное учреждение «Отдел капитального строительства и жилищно-коммунального хозяйства муниципального образования «Агульский район» агъаф, джикъи мис ЖКХ пуна арта. ЯгIайин ягъас мисаъ кар аркьая кIилди 13 инсанди, мебурикес хьибуд куьчабурин курар аркьаттар э.

ЖКХйин ахттигьардиъ ая ппара курар. Мебури кIили гъа рекъерин, хьеттарин, угаттарин четинвелар. Ме идарайи аркьа кардихъас гъургъучин, хьевас пас хьасе джалла ЖКХбурин курар сасуманди дава пуна. Ппара хIа джуревел ая шагьурарин ЖКХйинра хIураринттарин. Шагьурариъ, фикир акьучин, мебурил ппара кар алди ая. Чишна, шагьурариъ ая ппара махьтабарин джигагьар, мисаъ ая лифттар, газар, канализацибур, хъара джуре курара. Мебурин гьер са чIирхье кардихъ хъай кканде ЖКХйин пешакар инсан. ДехIела гьер са куьчайиъ акьуна аве бицIи идарабур, ме курарил алгъузанас. Мебури хабди гъа джувабдар инсанарин гьер са тIалабихъас, суалихъас.

ХIурариъ газар адавайчира, амма аркьа курарин сан чIукь дава. Мисан гьавара джуре э шагьурарихъ хъуттурфуна. Ке четин вереф Iурдана хьеттарихъай э. Сагелай ругъучин, ппара читин э мебур хаб кIилиъ ачихьас. Рекъеринра четинвелар аве, ая мукьуйихъ хъуттурфуна. Хье мукьарин ругун гьавайихъ хъуттурфуна акьуна кканве дуз аркьайчира, асфальт алгьартайчира, гъван йирхIайчира. Айчира гьер са четинвелдис джиркIенде джуваб.

Амма ягIайин ягъас, фидегьен хьин варха ичира шагьураригьас, ппара курар акьуная хье райондиъра.

Фи курар акьуна айчин, фи акьас мехIелди амичин, ягIар акьас редакцис ахъакьуне райондин ЖКХ идарайин хIатти Шабанов Шабан Абдурахмановича. Ме суаларис Шабан Абдурахмановича йине джувабар: «Гьелбетта, гъургъучин акьуттарихъасра, акьас мидеттарихъасра, ппара курар ая. Хьин башламиш акьасе сифтта гъургъас гьалдис акьуна курарихъас. Хьин Iайи вархалди весттава, пасе сагелай 2022-пе иса акьу курарихъас. ЧIаъ акьуне парк Ричинская 232 «а» агъа куьчайиъ. БатIар акьуне Гъудагъаринра Гъудгъуларин махьтабар. Дуз акьуне асфальт алгьатуна багъариъ больницабурин удигь ая майдан. Хъара батIар акьуне Типпагъарин, Гехъуьнарин, Гъудагъарин, Миссиарин хIурариди вере рекъер. Агьал худтти батIар аркьая райондин администрацин идарайин удигь гьая хIеят. Мисас атая гъван. Мисан курара ккиркIвасе ме исан ахирарис. Гьер ме са кар башламиш акьастти, чин сагелай суракь аркьа бехIсунин мегIрака. Мисаъ гъалиб гъушу подрядный идарайи хабди кIили гъа акьуна ккане кар. Ппара гьер джурейин курар акьас гъалибвел гъушуне «Атлант Трейд» агъа ОООйи. Мебури Iари са ттиан иса арайил акуне ерхьи объект. Гъалибвел гъушуттаригI гъуйи ООО «Дорхан Каспий», ООО «Альянс», хъара джуре идарабура.

Вере исасра ая аркьа курарин фикирар. Чин гIаве гьер джурейин программабуригI. Садпеф, «Модернизация школьных систем образования Республики Дагестан» агъа программайлди батIар акьасе ФитIарин махьтаб, Iудпеф, «Местные инициативы» агъа программайилди батIар акьасе Типпигъарин мазгитан удигь гьая куьча. Хъара ая «Комфортная городская среда», «Мой Дагестан-Мои дороги» агъа программабур. Мебурин кумакилди дуз аркьа рекъер, куьчабур, мугIар», — пуне Шабан Шабанова.

Мишттин ахттилатар унихьу арайи, фидегьен рехIетти аркьая ме курар пуна фикир ве. Шабан Абдурахмановичан чIаларилди: «Агьал ая ке хIа читинвеларикеске удигь ая кар аркьа инсанар адахьуб. Кар ягIаттар, гъавурдиъ аяттар. Фуш кканчира хьурай пуна, йина кьиматра, фацанас вейдава, фас пучин, хабди мебури акьу кардихъас ке удигьай джуваб ирцIанф чин э. ДехIела гьер са кар акьас гIайчIу бригадайихъди чин мугъатди тIурша. Хье районди кар аркьаттар адавахаб, чин кьабул аркьа ппатталасра. Час кар гьана акьучира баладава, ккандеф акьу кардин дуздин ахир кIил э».

Луиза Гусукаева