18-пе августи 2022-пе иса Халисат Абдулкадировнайинра Iели Абукаровичан хьуне 50 ис хъай хизанвелди дуламиш вей. Ме кар багьана хьуна мебурин хулаъ хьуне хIа мегIрака. Мисал завал хьуна уйи джала шиникквара, кIилди гебурин багу-кIилинттар. Ппара шадтти ушуне гебурин хIаягъан маджлис.
Халисатра Iели Iудар мегIелимар э.
Iели Абукарович хунаф э 1947-пе иса Бедухъарин хIуриъ. Ама садпе классилас мич ге хурай хьуне Типпигъарин махьтабиъ. 1964-пе иса, махьтаб ккиркIугъилди, хъучучIуне ге кар акьас. 1968-пе иса файшуне ге армиди.
Гидас адихаб 1970-1974-пе исари хьуне ге хурай ДГПИйиъ физкультурный факультетиъ. Хуруна ккиркIухаб адине кар акьас Типпигъарин махьтабиъ.
1989-1994-пе исари Али Абукаровичакес хьуне директор Миссиарин махьтабин. Гидас хаб адине ге Типпигъарин махьтабиди физкультурабур ирцIан мегIелимвелди.
2002-2007-пе исари хьуне Iели Абукаровичакес Типпигъарин махьтабин директор.
2007-2020-пе исари гикес хьуне социальный педагог ге махьтабиъ. Хабди айчIуне пенсиди. Кар Iели Абукаровича акьуне 55 истти.
Гин хизанар Камалова Халисат Абдулкадировна хунаф э 1952-пе иса Типпигъарин хIуриъ. Муядпе класс ккиркIухаб ге ушуне Буйнакскдиди хурас бицIи мегlелимарин училище. Хуруна ккиркIухаб Буйнакское педучилище, 1972-пе иса адине Халисат Абдулкадировна хаб хIуриди. Гьеге иса ушуне ге шувас Камалов Iели Абукаровичас. Хабди хьуне ге махьтабиъ кардил, бицIиттарин мегIелимвелди. Сара гидас найчра Абдулкадировна ушуф дава, кIилин Iуьмурди кар аркьай хьуне Типпигъарин махьтабиъ. ЯгIара кар аркьай аме Халисат Абдулкадировнайи.
1980-пе иса ге заочно учIуне ДГПИйиъ «Педагогика и методика начального обучения» агъа факультетиъ, гъушуне учис хIа гIилми. Гин трудовой книжкайик са приказдала кидава, ге кардил гъузу вахттунинф «Тпигская СОШдиъ». Учин кIилин Iуьмурди Халисат Абдулкадировнайи кар аркьафе Типпигъарин махьтабиъ. Ттиъ гин кар аркьай хьуне 50 ис.
Уч кар аркьадегьен гагьди учихъас идже сана дала атуфдава Халисат Абдулкадировнайи. Кар ппара гIешкъ ай аркьа дишагьли э ге. Шиниккварисра, гебурин дадар бабарисра ппара кканве ге мегIелим. Фас пучина, ги шиниккварин йиркI гъадива, дарсар иджи ягIар аркьа, тамашилди шиниккварис дарсар гъа. Халисат Абдулкадировнайис ппара кканве учин шиникквар.
Халисат Абдулкадировнайи иджи кар аркьавелди райондин хIаттарира агъламиш аркьайи ге. АцIуна грамотабур, джавизар фая гив. Халисат Абдулкадировна э «Отличник народного просвещения РСФСР» 1988-пе исалас мич. Хъара 2004-пе иса гис йине звание «Заслуженный учитель РД» агъаф .
Халисат Абдулкадировнайихъна Iели Абукаровичахъ хъайя гIуьфу шиниккв: са кIиркIна якьу руш. Джалабурив фая высший образованибура. Джала шиникквар дуьхьуьна, чиппин хизанарихъай дуламиш вея. Iуд дуламиш вей ая Петербургдиъ, Iуд ая Махачкалайиъ, сад ая Дербентдиъ. Абукаровичахъна Абдулкадировнайихъ хъайя 14 хуттуларна 6 хуттуларин шиникквара
Али Абукарович, Халисат Абдулкадировна, чин джала редакцин работникарира мубарак аркьая чвас чве къизилдин цIакIин. Чве джандин сагъвел, йиркIуран рехIетвел кам дакьурай.
Нафият Шамсудинова
