КIвал акьуне рекъерил кIе инсанар

Гьер иса ноябрь вазала хьибудпе эльхIяд ягъа джалла дуьяйиъ йиркIурал аркьа машинаривас рекъерил кIе инсанар.

Ме иса ме ягъ алчархьуне 21 ноябрдил. Ме ягъахъди Дагъусттандиъра акьуне гьер джурейин акцибур. Махачкала шагьурдиъ савусал завал хьуне МВД йин сотрудникар, Министерствойиас по делам молодежи, Махачкалайин управлениас образованин, хъара детско-юношеская автошколайиъ курар аркьаттара, «Юные инспекторы движения» агъа отрядра. Ме завал хьевусаъ мебури агъатуне джагвар шарар ме иса аварибуригI кIе инсанарин ттурара ликIина, гьучархьеттарис йине кеджар, йиркIурал аркьаттар фиштти дузди гьикун кканчин рекъуьъ машинар. КIеджар йиф кедавай, чиппира ахъаркьайи инсанарис.

Мисаъ уйи начальник отдела пропаганды БДД УГИБДД МВД по РД Руслан Рагимован чIаларилди, рекъерил вере аварибур ке хIа багьана э кIебас джигьиларна, бицIи шиникквар, идехIела ппара тIалаб аркьа инсанарикес эхттият фай, имунилди гьикагъилди машинар. 

Мебурин хIисабарилди гьеме 2021 иса хье Дагъусттандиъ хьуная 1206 аварибур, кIеттар хьуная 255 инсан, мебурикес 9 шиникквар. 

Гьемисаъ суман акцибур хьуне хье Агъул райондин мактабариъра. Шиниккварис ме кардикес муфиIет верегъилди, фикир аркьагъилди, гъавурдиъра архьагъилди агвар акьас мебури унахъуна уйи ДПСдиъ кар аркьа инсанарис. Гьегебури агвар акьуне шиниккварис фи акьун кканчин машинар вере рекъуькес кейчIавагун, хабарар гъушуне шиниккваривас ягIайчугас рекъерихъ ирхIуна знакар. Ме мегIрака акьас шиникквар завал акьу мегIелимарин чIаларилди: «Мишттин акцибур чин хIел-хIел аркьай аве, фас пичин ме джурейин дарсарикес мебурис муфиIетра ппара кея, ахъакьуф, агвар акьуф дахи кIилира фарцанде шиниккварин. Хабди чаб хIа хьуна, чипихъ машинар хьегун, мебурис рехIет хьасе машинар гьикасра, садтталара дузди, имунилди, сасра инсанарисра зарар даверегъилди».

Ме ягъ — джаллайис ппара пушмал ягъ э. Нагагьра амефхьасттава хизанар рекьерил багу-кIилинтар дакIеттар яри джандин сагъвелдис зарар дагьеттар. ЯгIайин ягъа джаллабури фикир аркьай кканде, рекъуьъ эхттият гьертти учи учис акьун кканде пуна. Е са хIуькуматин гIедати, е са сасра цIупе велдигь гъурзар акьас хьастава инсан, учин кIили дарукьуна. Гьегиштти дахьехаб, хьевас ме аварибуринра, кIеттарин сан чукь акьас хьасттава. Имунилди машин гьикубахъра эхIттият акьубахъ фера хъучархьасттава.

ГьакIанди пуна гафарар дава мебур: «НехIекь инсан рекъуьъра гьучадархьурай!»

Батитай Габибулаева

Добавить комментарий

Ваш адрес email не будет опубликован. Обязательные поля помечены *