Хье хуппурарин къирагъарихъ, дуза хуппурариъ, узуна аяттарихъ, джилариъра агъучIуна агуфе хьес митIри дегьен гьававел ай хIа цIабара але IуькIер, дихьи кIилиъ агъучIуна аве гебурин мучIе ире тукар кунарик кикъва зазар алди.
Тукарин гIанариъ тумар аве, гебур далгъванас акьас гьер мукьариъди кандик, хIуппак, малдик кикъва, керхьугуна джилиъди агъучIас. Ме IуькIуьн мерIуьс парI агъа, цIабарисра цIаб пуна эркьвайдава, парIун цIаб агъа.
Са IуькIуьн гьер мукьуйис ттурар ая. Уч ппара гуджлу IуькI э ме азман сиве, уьркIи айшу мерIера хъай. Ккедихьасра читин э. Езан аркьагуна вецар ккитIуна, ккеттархьу парIар ттуттуна гIадихьафи къирагъихъди хаб агъдучIас. Уч агьучIу мукьуйиъ сара ферра агъдучIурай агъаф суман ичина цIабар гудж алгъихьа багулив агъучIуна IуькIерис.
АгъучIай ами гIудул цIабар кея IуькI ичира, хIа хьухаб читин э гин эвел акьас. Джалла IуькIерин суман минра иджвелин багьавел ая, мин ппарара кей аяф хьасе. Учин вахттра Iу ис дала вей дава мин: сагелай тум агъучIуна бицIи цIабар агъучIа; Iудпе иса тумара вере азман кьартIанай агъучIа.
Ме IуькIуьн мерIерик ппара кея цинкдин, хромдин, кальцийдин, сулендин, ифан, магнидин кьелар, жирные кислотыбур, А, В, С, Е, Р витаминар, хъара джуре дармандис вере шейэра. МерIер ишламиш аркьа тIагIубарис, уькубарис, зур фатубас, эмкI ичибас, себ фатас, гIан гIудул акьас. Хъара ми алттива аллергия, зурзуб.
МерI гIихьу хьед ишламиш аркьа къарфун иттагуна, зурин читинвел аягуна, себ ая ус иттагуна хъара сае итталарисра. ЦIабарихъас гъургъучин хьин, гебур кIен багвди (Iекве багьди) алихьугуна иттая уьцIуларил, дуьхIуьбарил, кумак ве.
Дарукра ппара витаминар кея мин. Iайи къукъастти, алакьуна Iелеф э, ппара йод кея мик, аларкьагуна тIубар кIари аркьа. Тукарикесра кеяфхьасе муфеIет, зас унихьуфттава. Са кар ягIа — мин тукар варварис ппара кканеттаре, гисаас ппара уьтт гъа варвари. Ме дуьньяйил са задра ферра давай дава аяф, гьерттин учин вахттуни аркьа кар ая.
К.Мирзоев
