Кардис йиркIв  йина кар акьу дишагьли

Исан кIилил алчархьа гьер джурейин хIаягъар. Ая хIа фикир ирцIанттар, ая кьацIра хIаягъ идефра ягъардахьуна алттархьаттар. Ме ая хIаягъарикес фикир дайина атас вейдава духттурарин ягъас. Гьер иса мебурин хIаягъ аркьа 19-пе июньди. Инсан дуньяйил садпегелай бадил хьу ягъалас хаб Iусе хьуна луькIе арайихъди рукьуна багулив фаяф духттур э.

Духттур пе арайи джаллабурисра кIвал ве хIа курсар хуруттар. Амма, фикир акьучин, бицIи духттурарин вазифара хъара ппара хIайи э. Сад мишттин духттурарикес Раджабова Зайнаб Гаджимагомедовна. Хуне ме Агъул райондин Миссиарин бицIи хIуриъ 1968-пе иса. Мин дадас агъафи Гаджимагомед, бабас Пери. Мебурин хизандиъ хьуне ерчIу шиниккв- ерхьи кIиркIна хьибу руш. Дадар-бабари те вахттари, джаллабури суман, фи кар айчин аркьай дуламишвел аркьай хьуне. Са вахттуни дад хьуне РайПОйин складин хIаф. Дахьучин хIа пай колхозарин курарил Iуьмур ушуне мебурин, кегъархьу шиниккв хурасра хьикай.

Зайнабас уч бицIи аме гунан хаб мус хьучира кьабулди и духттурдин пеша. Мин йиркIуран мурад хьуне, уч хIа хьугуна, хурас весе пуна духттурарин курсариди. Мин йиркIв руцIай ахьуне джаллабурис кумак акьас кканди. Муядпе класс ккиркIухаб ушуне ме учIас Дербентин медучилищейиди. Те вахттуни гич адина уйи Пермский областтиас шиникквар кьабул аркьа инсанар. Иджи хура шиниккварис тахмиф акьуне шаб пуна хурас Пермский областтиди Губяха агъа шагьурдин медучилищейди. КIилди идже кьиматар ай ккиркIуне махьтаб, хураттаригI гIачархьуне Зайнабра. Алтухъ фикирар дакьуна, кьабул акьуне ми учис акьу тахмиф. 1984-пе иса учIуне ме хурас. МегIелимари ккилан дарсар Зайнаба гIешкъунис фарцанди хурай ахьуне.

1988-пе иса, хурубар ккиркIуна, адине ме хIуриди. Кьабул акьуне кардилди райондин больницайиди бицIи шиниккварин патронажный медсестравелди. Учихъ те вахттуни шиникквар хъудавайчира, джаллабурилас иджи гъавурдиъ уйи ме кардин, гIешкъунис вейи шиниккварилди аларуцас. Джигьил бабарис ягIар аркьайи, фиштти ахъаджихIайчин шиниккварихъ. ГIикIас-гъаттивас, фи вахттуни хьед ирцIанчин, фи курариъ ул ачартайчин. Багами шиникквар гъайшагунас кIилихъ хъувейи ме. Бабарисра кканвейи ме адигуна, йиркIурас рехIет вейи Зайнаб аларуцуна ушугун.

1996-пе иса хьуне микес дежурный медсестра терапийин отделениъ. Гьалдис бицIиттарихъай ичин кар акьуф, мисаъ хIа пай Iусеттар и аеф. Мебурис хъара ппара фикир йина кканвейи. Iусеттарихъай батIар чIал пуна, гъургъуна, мебурин йиркIв гъадивуна кканвейи. ЙиркIв фай кар аркьай мисаъра баркалагь хъаф и Зайнаб. Миссиарин хIуриъ яшамиш вей, гьер ягъа Типпигъди кардилди адис четин и мис. Сара, 2004-пе иса гьикуне ме хIуриъ ая ФАПдиди медсестравелди. Муя исалас, 2012-пе иса хьуне микес ФАПдин хIаф. Кар аркьа гагьди мил алчадархьуф адава. Итта инсан чара кканди ади вахттуни, хIа курсар, бицIи курсар агъайдава. ДехIела Зайнаба хIуриъ гьанас фи руб, дарман, кумак кканди айчин, вахттуни къайгъу аркьа.

Хъара четин хьуне коронавирус агъа иттал бадил хьу вахттуни. ХIуриъ иттаттар ппара хьуна, уликкес ккеттархьас ппара гучIайи мис. Ягъди хIа духттурарихъай гъургъай, фи руб-дарман аркьайчин, Зайнаба мебурихъас ул хъадихьундава. Ме четин вахттуни иджи кар акьубан Зайнабас Дагъусттандин хIаттин ппаттаасра, Агъуларин больницайин хIаттин ппаттаас йине Благодарственный кIеджар.

Духттурарил ппара хIа джувабдар алди ая- инсандин Iуьмур. Миссиъ инсанар ппара андавайчира, милди тIалаб- лама фай вереттар кам вейдава. Учира, Iуьш-ягъ, вахадну, отпуск дагъай учихъди адиттар хъадикайдава. ХIурин инсанарин «Духттур Зайнаб» агъай михъди ппара хIа хIуьлмат-нуьхIуьбат ая.

ЯгIа Зайнабахъ хъая Iу рушра, хьибу хуттул. Бабан кардихъди ая гIешкъ аргвай, Iудара шибери хуруне духттурарин курсар. Мебур яшамиш вей, кар аркьай ая Санкт-Петербургдиъ. Зайнабасра ая айчIуна вес мункинвел шибер ая усади. «Зе гIешкъ але кар, хIурин инсанар атуна зун найчра весттава», — агъа Зайнаба.

Луиза Гусукаева

Добавить комментарий

Ваш адрес email не будет опубликован.