Къадагъабур дакьуна иттал ккедикас хьасттава

Магьа Iу ис хьуне гьеме ягъари коронавирус агьа бала аттархьуна. Амма ягъара гIелимаривас, духттураривас алнаджехI гушанас хьуна адава. Саса мукьариъ Iайи алгъазина а яме гIуьзур. Хье  хIуькуматиъ, республикайиъ,райондиъ ппара Iайи читин положение хьуна ая короновирусдихъай. Ягъалас ягъа иттархьеттарин сан ппара вея, кIинаттара ппара хьуна ая. Ппара къакъ  алди ая духттурарил, кьацра «красная зона» агъавусаас айч!вас мункинвел адава.

Гьемишттин гьава хье райондиъ агуна, хье хIаттари, духттурари инсанарикес тIалаб аркьа эхIттият акье пуна. Вахттуни, сагъвелди мугьлат ирцIандехаб, гьер инсанди руб йирхIуна кканде. Ке удигьай ме вакцина йирхIубакес учисна учин хизанарис къала хьасе.

Амма ппара инсанар ая мишттин фикир фаттар: «Зун вакцинация акьуна ая, зас ме итталикес зарар адава». Ме ппара хIа гъалатI э. Гьеме иттал грипп суман гьер джурайин кьалибар фарцанде. Индийский штамм агъаф, дельта-штамм агъаф, хъара хьибу-екьу джура ая.

Руб йирхIуф кидай, хъара джуре эхIттият акьуна кканде.Алчушуб-алттушуб хьедегьен чIукк акьуна кканде, маджлисариди, гамачIариди ушуб гъурзар акьуна кканде, Iайи багу кIилар кидавай. Дикванариди, маршруткабуриди, гуни Iелевусариди ачаверегуна, маскабур аликIуб герекде, гьучархье инсанарихъай рихун-салам аркьагуна, зарар кидава манзилигь гузуна кканде. Байирдиас хулади адегуна, сегIбун атай гъилар Iуьрччанди кканде.

Короновирус Iайи иблис иттал э. Чун  чве сагъвел духIудегьен гагьди, са инсандивасра чвас кумак акьас гьасттава.Iуьрусарин мисала хье ч!алалди пухаб, учи уч ухIа инсан аллагьдира ухIасе. 

                                                                                       Абдулрашид Рамазанов

Добавить комментарий

Ваш адрес email не будет опубликован. Обязательные поля помечены *