Инсандис лазим вере витаминар кея клубникайик

Ахьастта са инсанра ме некьихъас ун дахьеф хъара тIем дагIаф. Джалабурис ягIафра э, хъара мин тIем сасра емишарихъай фачикIасра хьасттава. Клубника хIисаб аркьа земляникайин са джура. Амма ке адлу багъманчибуривасракегьей пас вей адава фи джуревел айчин клубникайин земляникайилас.

Фас пучина, чаб сад суман ичинара але ттурар джуреттар э. Миштти агъа са пай багъманчибури, земляника пуфе агъа ме некъис хьиба цабарил вереттар идехIела, хъара мин тIемра бицIи IуьчIи э. Ме клубника агъа джурайин некьи чукь гирген куц алеф тIемра ширинф э, земляникайилас клубника хIа э.

Хъара тумар ме некьин вереф сасра емишарин суман гIанаъ дава, вереф варттал алукъуф суман. Рангар Iударин садсуманттар э. Ке удигьай ме некьи агъучIайи дарариъ. Хабди узай хьуне инсанари чиппин багъариъ. Хье хIуькумати ме некьи файдине цIемуядпе асирдиъ1654 иса Петр-I дин дада Алексей Михайловича, Англия агъа хIукуматиас «Виктория» агъа джура.

Агьалдин вахттарис клубникайин аттивуная ппара джурабур. Хъара ая мебур исаъ Iугелай емиш ицIан джурайинттар, хIапай инсанари чиппин багъариъ узас алучIа Iу-хьибу джура клубникайин, хьудегьен батIар емиш хьас. Авала ме емишихъас унихьайчира, китабарик аргвайчира, тIем акьасра кегьей, мункинвел адавуйи, агьал суман канне емиш алчархьайдавуйи.

Гьал инсанарис ая мункинвел каннегъилди канне емиш гъушанас, Iурдана кканчинара аргва хьес клубника дикванариъ. Амма ме некьи гъуршандегуна, батIарди хъуттурфуна гIаттивас алучIай кканде, фас пучина хIапай емишар агьал гъареф варха мукьариас, мебур чIир дахьас, батIар куц хьас, ата дарманар. ДехIела хьин алучIай кканде хье дуьяйин емиш гъушанас, хъара учин вахттуни хъучархьугуна.

Кьанди ме емиш узас алучIай хьуная хIурариъ ая инсанарира. Емишарикес ке дахи вахтунис вереттар хIисаб аркьа клубника. Хъучархьа ме некьи майдин вазалан сураъ июндин вазалан ахирасттегьен. Са джура ая цулана хъучархьаттар. УхIас ме емиш ппара гагьди вейдава, дехIела аттархьугъилди джалла алучIа дахи фичинара акьас, кампут хьурай, варенье, кканеттари ругъасра аркьа.

Ме емишин хайирдихъас пучина, ппара инсандис лазим вере витаминар кея, ацIуна итталарис кумак ве. ДехIела хьес духттурари агъаф гьер емиш учин вахттунис хъучархьугуна IуьтIанас алучIай кканде.

Наибет Гасукаева

Добавить комментарий

Ваш адрес email не будет опубликован. Обязательные поля помечены *