Инсан ягIархьас, гихъай хьуна кканде

Агъуларин мисалабур аяф э:«Инсан ягIархьас вун гихъай байирдиъ хьуна кканде.» Хъара  мишттинф: «Инсан ягIархьас вун гив девлет фачиян.» Инсанар ме дуьйил гьер джуреттар ая: лиханас кканеттара дакканттара, Iайвел кеяттар, кидаваттар, хъара саебур. Зас мегелай  ликIенас кканди ая, гин зурбавел  агуна, кьацIра ккулинвел фадавай лиханди  сувариъ аруца  инсандихъас. Тпигъарин ади хIурин  маларихъ вере ккабан ая  Мусаев Надир.

Ге инсанди зав  куруф  агъагъа джемеIетин малар чIирихъди ери-муя километр вартт кIил акьуна. Сае вахттари  ме маларихъ Iу инсан  вей  ичин, ме  сатти э аяф. Гьертти  учин  дуламиш аркьа, кардис загьматара аркьа, учин кар ду пасе хьин. Гишттин загьматилди лиханттар хье сувариъ чIукь адава, амма зас пас кканди аяф сасра кардихъас э.

Машиниъ учIуна алгъавей хьуне зун са варха сувади хIуппар узаттарихъай. Хубджи вартт агъархьуф агуне  зас  варттал кIурар алчахъуна ая чардах, багулив, хьед кевереттар ичира  хьибуд бицIи чардахара фай уйи. Ме мукьуйигь гъирхIундава чин, вартт ушуне. Амма зас кканди уйи гъузуна хъуттурфуна  ишкилар йирхIас. Акьуна аяф  чардах дихьи парзал, суварин те багвар ме багвар  аргвагъилди.

Хьес ягIа  рекъера фиштти авейчина суварихъ. Чардахигьди гьархьасттира, вартт ушухабра аргва зас  рекъуьн къирагъихъ завал акьуна ая гъванарин пусар, сур мукьариъ ругар ккедахъуна, лазим  мукьариъ ругар ахъуна. Зе  хиял хьуне ти-ми дурухIай акьуна аяттар э пуна.

Са манзил ушуф дихьи рекъуьн  багулив аргва зас ломра кIетIара туьлуьнгра. Ферра адава сувариъ гишттин саниIетар агуб Iеламат ду? Хъара кьарар дахьуна  хабар  гъуйугуна захъай яаттарифас, джуваб йине, хье маларихъ хъаяттинттар э пуна. Са арайилас вей ая машинигьди учра бадил хьуне. Гъурзар  акьуна машин  чахъай  икIуна файшуне чин ме. Алгъарукьуне чин че азалигьди хабарар  аркьай.

Уч верегунас  саваб бадалди. Малар фай  алгъарукьугуна, Надир учин саниIетара фай аларуца рекъерил, элра  ккетвес, савабара  къазалмиш акьас. Инсанди ахъухьуна е гъархьуна вахт фадартай, инсанарис  иджвелар аркьай учис савабар аркьай сакинди эркьвай адава. Хъара савабар  ликIирай учис. Гьинавас хьас  ичин  гиштти акьас, е гьина акьас ичин, гагьа пурай.

Чердахин кIенаккра  ппара рехIетар  акьуна  ая: ахъухьа диван, мац, гъил Iуьччанвус. Джалла ая. Ге бицIи чардахар зас агуттар ги акьуна аяф и учин  гъурур кичучIас. Гебурис сарин хьас. Гебурис адарцуна фурин багвар файдина ая  ямаг ккигьатас.

Агъулаас зурба инсанар, загьматикк хIав ккеяттар кам дахьурай. Надиранра джандин сагъвел кам дакьурай, джемеIетис муфаIат кей.

Инсанарихъай ппара гагьди  дахьучира акьуна ая  курарилдира ягIар акьас ве  кардихъди фишттинф ичин агугуна. Садпе кьимат инсандис хъуьсуйилдира йис ве.

Комментарии закрыты.