Коронавирус — ппара иблис иттал э. Фас пучин, ми са гагьра гIаттудушуна гьер шартIарихъди духIуба ве, аман ами сагъ акьасра вейдава. Хье Россияйиъра ацIуна инсанарис кедишиная. Ягъ-ягъалас иттаттар алтухъ ве. Джуре хIуькуматарин хIел хъара четинди ая.

Ахиран ягъари Дагъусттандиъра хьуная ме иттал кедишиттар. Ме кар аслу э тич-мич алттушуная инсанарилас, мебури чиппин эхIттият дакьуна гьерттарихъай гьучархьа, хабди тебурисра кедиша.

Гьемихъас хье хIуькуматин хIа пай шагьурариъди, районариъди хъикIуная рекъер. Рекъер хъикIуб кедавай, гьер хизан учин хулаасра аттмева агъа ппарагIди гереквел адавахаб.

Гереквел э: хIуькуматин кардил ушуб, руб-дарман гъушуб, Iелеттихъди дуьканди ушуб, чIирхI фадахъуб, хъара мал-къара адикуб. Аттверегуна аликIуна кканде агъа маскабур.

Ме курар акьуна ачадигъилди Iуьччуна кканде гъил хъуьссу. Ухуна кканде хьудегьен ппара куче чай, ибгIа хьед, IуьтIуна кканде лимон, имбирь, емишар иммунитет цIуппе хьас.

БицIиди дехIера ме итталин симптомар агучин, хIеракат акьуна ушуна кканде больницайиъди.

Духттураринра загьмат ппара хьуная ахиран вахттуни. Джаллабурис къадагъа акьучинра кар, ракк, мебур кардил алдея. Чиппифас вере беседабур гъай гIаруцая хIураригI, больницайиъди адиттарисра ахъаркьа фи аркьайчин. Руб-дарман, дезинфекция аркьа.

Аллагьди ликIиттиккес ккейчIвас хьасттава, амма хьеалас аслу идеф хьинра акьуна кканде.

Джаллабурис Аллагь кумак хьурай! Фушра иттар дахьурай!

Салихат Малагусейнова