Ахиран вахттари ппара хIевалат хьуная хье дуньяйиъ терроризмна экстремизм. Ме кардихъас, мебурикес кея зарарихъас ппара гъургъа хье хIекимар, гIелимар, мегIелимар. Саддалара ме терроризмна экстремизмдин Iайвелихъас гъавурдиъ ихьуна кканде кегъархьай ая джигьилар, хабди мебурисра ме кар ширин дахьас. Миштти идехIела, ахиран вахттари хье хIуькуматиъ ме кардис ппара фикир ирцIанде, ке удигьай махьтабариъ ая шиникквар дуздин рекъуьъ хьурай пуна.
Махьтабариъ аркьа бехIсунин мегIракабур, дарсар, хъара савусал завал акьуна шиниккварихъай гьучархьа духовный управлениас адеттар, райондин имамар, ахъаркьа инсандис ирцIан зарарихъас терроризмдина экстремизмди. Гьеме кардис ппара фикир ирцIанде хье райондин хIаттарира.
Гьер иса, са вахтт фацуна, хье администрацин икьрарилди джалла махьтабариъ ая шиниккварис аркьа «Терроризму скажем «Нет!» агъа мегIрака. Ме мегIракайин матлаб э шиникквари гьаме гафарарихъди хъуьдуьхьуь ишкил йирхIуб. Гьертти, учин фикирдиъ фиштти айчин терроризм, агвар акьуна кканде кIеджик.
Ме мегIрака акье пуна буюрмиш акьуне райондин хIатти Закир Каидова хье администрацин отделдис по социальной политике и муниципальных услуг по вопросам культуры, спорта, молодежной политики, религии и туризма.
Мебури, чиппил алеф акьуна, башламиш акьуне ме конкурс. Шиниккварис ишкил йирхIас мугьлат йине 17-пе октябрьдилас 3-пе ноябрдихъди рукьуна. Хъара ме конкурсдин уйи акьуна ккане шартIара. Иштараквел акьас ахтигьар уйи 7 ис хьуттарихъас хъучучIуна 17 ис хьуна шиниккварис. Ишкилара сайинра кумак фудавай йирхIуна кканди уйи чиппи шиникквари, чиппин Iемаларфарайилди (фантазия). Гьер махьтабиас кьабул аркьай уйи 3 ишкил, гилас вартт кидавуйи. Ме шиникквари йирхIу ишкиларис кьимат йис мебури завал акьуна уйи жюри. Мебурин вазифа и джалла кейхьунадегьен ишкиларигIас гIаттивас 5 ке Iайи батIарди, фикир фай йирхIу суман ишкилар. Жюрис кьабулхьуна уйи кьиматилди садпе мукь йине Гарунов Камилас (9 класс, Буршагъарин махьтаб), Iудпе мукь – Гамзаева Алжанатас (9 класс, ЧIаарин махьтаб), хьибудпе мукь пай акьуне хьибуйигIди: Габибулаева Самера (11 класс, Типпигъарин махьтаб), Исаева Иная (6 класс Гехъуьнарин махьтаб), хъара Каидова Хабизат (2 класс Гъудгъуларин махьтаб).
Хабди, ме шиникквар джалла завал акьуна администрацин актовый залдиъ, райондин хIаттин заместительди Назим Амаевича йине мебурис джевизар.
Батитай Габибулаева
