27 февральди Агъул райондин ЦТКНРдин идарайиъ хьуне хумбарин маджлис. Ме мегIрака арайил акьунаф Агъул райондин имамарин маджлисдин хIатти Магомедов Юсуф Нурисламовичан фикирдилди э. Кьастт ме мегIракайин э багъш акьуб мусульман гирами вазарис-Раджаб, ШагIбан хъара Рамазан вазалас. Исламдин диндиъ хумбеф лап хIа панагь э пуна.
Ме мегIракайи ишттараквел акьуне идемарикес Юсуф Магомедова, Буршагъарин хIурин имам Багьаудин Сулейманова, хъара Дербентский райондин Хазар агъа хIурин имам Рамазанов Кьулбана. Хумбарикес Рамазанова Мухабат, (руководитель отдела просвещения по ЮТО), Магомедова Мумина (руководитель просвещения по Агульскому району). Ме маджлисдин мегIракайихъди адине Агъул райондин гьер хIурариас хумбарна бицIи шибер.
Сифтта ме маджлисдиъ саламдин чIал йина гъургъуне Юсуф Магомедов.Табрик акьуне хъучавея Рамазандин ваз гьеме маджлисди адинадегьен хумбарис, СВОйиъ ишттараквел аркьа шиниккварин бабарисна хизанарис, чиярис. Джалабурис йине сабурдинра иджвелин насихIетар.
Хабди гъургъуне Кьулбан Рамазанов. Учин ппаттаас гьеми йина саламра, гъургъуне гьалдин заманайи фиштти бабари тербияйилди, ислам диндин тIалабарилдина шартIарилди шиникквар вардиш акьуна кканди айчина. Шиниккварис фарз алчархьу вахттунис къулгунин шартIар ягIар акьубахъас. Фас пучин, хизандиъ ме кар хIапай алчархьаф бабарил э. Бабан тербия шиниккварис хIа э.
Тербия пугуна, мисаъ Буршагъарин имамди Багаудин Сулейманова учин ппаттаас гьеме маджлисди адинадегьен хумбарис, диндин чиярис салам йина гъургъуне дин-теIеттин шартIарихъас, дишагьли фиштти учин хизан, хал ухIуна кканди айчин, йиркIураастти хуруне дуьгIебур гьеме маджлисиди адинадегьен хумбарисна джалла бабарис.
Хабди, идемар аттушухаб, мегIрака давамлу акьуне Мухабат Рамазановайина Айша Абдулкадировайи. Хумбарин арайиъ хIапай гъургъуб хьуне ке лазим иде суаларихъас. Мебури ахъакьуне исламдиъ фиштти дишагьли хизан ухIуна кканди айчин. Гьучафайдине мисалабур, хIедисар, Адамна ХIевайин заманайихъасхаб, пайгъамбардин заманайилас мич дишагьли хизандис лап хIа панагь э пуна.
Ахирахъди ме маджлисдиъ агъламиш акьуне дишагьлибур, хье ке ккане пайгъамбардис багъш акьуна, мегIрака арайил акьас кумак акьуттар, хъара бицIи шибери хуруне пайгъамбардис шаирар. Мебурисра йине савкьатар. Гьемишттин маджлисар хумбарис хъара ппара аркьай кканде пуне просвещенин отделдиас адина дишагьлибури.
Гасукаева Наибет
